Марий театрын тӱнямбал театр Олимпиадыш логалмыжым кугу сеҥымаш семын аклыман.
14 июньышто М.Шкетан лӱмеш Марий драме театрын артистше-влак М.Гафури лӱмеш Башкир академический театр дене пырля, Тӱнямбал театр олимпиадын специальный программыж дене келшышын, Г.Камал лӱмеш Татар академический театрыште «Дядя Ваня» спектакльым модыныт.
Тиде олимпиаде тюрк йылман театр-влакын «Науруз» фестивальышт кышкарыште эртаралтын. Каласыман, Олимпиаде латикымше гана эртаралтын гын, кумшо гана веле Российыш толын. Тудо тӱня мучко тӱрлӧ эллаште погына.
«Ваня чӱчӱ» (А.Чехов) спектакльым марий да башкир йылме дене модшо национальный театрлаште шындыме нерген ме ик гана веле огыл ойленна. Тиде Российысе национальный театр-влак Ассоциацийын темлымыж дене ышталтын.
– Тӱнямбал театр Олимпаидлан ямдылалтме годым спектакльын кумшо версийже шочын, – рашемда режиссёр Степан Пектеев. – Да Олимпиадыште сценыш кок театр гыч чыла артист иквереш лектын.
Спектакль-коллабораций – тыге лӱмдымӧ тиде кумшо версийым. Тудым Г.Камал лӱмеш Татар театрын у зданийысе кугу сценыштыже модыныт. Мо вигак шинчалан перныш: декораций Марий театрысе деч икмыняр ойыртемалтше, «куштылгырак», а сценыште модшо герой – мӧҥгешла, шукырак. Кажне геройым кок артист модын. Кок Ваня чӱчӱ, кок Сонечка да молыжат тыге. Кажныже – шке йылмыж дене. Мутлан, марий Астров, башкир Елена Андреевна кажныже шке йылмыж дене мутланат. Нуным умылаш рушла титр полша. Мутат уке, кок йылмыжымат палыдыме тыглай ончышылан чылажымат ужын шукташ куштылго огыл. Но залыште шинчыше-влак коклаште пеш кугу тӱткылык шижалте.
«Ме тиде кок национальный театрын негызыштыже ала-мом чыла калыклан келшышым муаш тыршенна. Могай йылме дене чон ойла – тиде огыл тӱҥ, тудо кӧргӧ шижмаш йылме дене ойла», – манеш режиссер.
Артист-влакын мутышт почеш, нуно ик рольым модшо йыгыр пелашышт дене икте-весым вашке умылаш тӱҥалыныт. Ик могырым, «пашаштат» куштылемын. Мутлан, Ваня чӱчӱн рольжым кок актёр пелыгыч пайленыт гын, лач тыге лектеш.
Спектакль пытымеке, спектакльым шындыше да артист-влаклан шуко моктеммут йоҥгыш. «Тӱрлӧ йылме дене ойленыт гынат, нуно икте-весым шижыныт, ик тичмаш спектакльым ыштен кертыныт», – тыгай ыле иктешлымаш.
Олимпиаде кышкарыште Национальный театр-влак Ассоциацийын практический конференцийже лийын. Тушто Ассоциацийын председательже Валерий Фокин, Тӱнямбал театр олимпиаде комитетын председательже Теодорос Терзополустаче театр-влак ончылно шогышо задаче нерген йодышым нӧлталыныт. Конференцийыште театрын директоржо Эрик Юзыкайн лийын да ойлен.
М.Шкетан лӱмеш Марий драме театрын аудиторийже утларак да утларак кумдаҥеш, тудо тӱнямбал кӱкшытан сценыш лектын – теве мо нерген ойла ты олимпиадыште шке мастарлыкым ончыктымо. Да тыглай спектакль дене огыл, а эксперимент шотан у постановко дене. У кӱкшыт ончыкыжо эшеат у йӧн-влакым кычалаш тарата манын каласаш чыла амал уло.
Светлана БЕЛКОВА
Фотом театрын сайтше гыч налме
