КУЛЬТУР ДА ИСКУССТВО ТЕАТР

Шкетан лӱмеш театрыште – «Тергыше»

7 апрельыште М.Шкетан лӱмеш Марий национальный драме театрыште Н.Гогольын «Ревизор» пьесыж почеш шындыме «Тергыше» спектакльын премьерже лиеш.

Тудым сценыш лукташ театрын художественный вуйлатышыже, режиссёр Василий Пектеев ямдыла. Кодшо кечылаште спектакльын изирак ужашыжым мыланнат, журналист-влаклан, ончыктышт.

Руш пьесым марлашке Ю.Байгуза ден В.Пектеев кусареныт.

Руш писательын произведенийыштыже действий XIX курымышто изи руш олаште эрта, а ме вургемым да декорацийым тачысе илышлан келыштаренна. Тыгай сӱрет мемнан кундемыштат иктаж вере лийын кертеш. Спектакльыште марла мутланаш да марла кушташ, мураш тӱҥалына. Постановко весела шӱлышан, тачысе илышым ончыктышо, сандене калыклан оҥай лийшаш. Но тыгодым шоналташат уто огыл: вуйлатыше-влак кеч-кузе озаланат, ондалкалат гынат, садикте мучаш толеш. Тыгай-шамыч декат тергыше толеш да чылажымат чыныш луктын кертеш.

Спектакльыште пӱтынь труппо модеш, мутлан, ола оза Антон Антоновичын образшым Российын сулло, Марий Элын калык артистше Иван Смирнов, тудын пелашыже Анна Андреевнаным Марий Элын калык артистше  Светлана Сандакова ден самырык актрисе Светлана Александрова, Хлестаковыным Марий Элын калык артистше Сергей Данилов ден Генрих Тимиряев да молат чоҥат.

А.БАЙКОВА

В.Тумбаевын фотожо.    

Опубликовать в Одноклассники

Добавить комментарий