Тыланет, салтак!
Шкеак кырыктат, шӱдырат, пидыт
Марий Эл, калыкна специальный военный операций эртыме кундемлаш ик эн ончыч, эше ӱмаште шошымак, гуманитар полышым чумырен колташ тӱҥалын. Тиде паша республик кучем кӱкшытыштат, мер ушем-влак коклаштат сай йогыныш виктарыме. Поро сомылыш шукырак да шукырак еҥ-влак ушнат.
Морко кундемын шочшыжо Медведево район Пиясир (Нурма) селаште илыше Татьяна Ивановна Ермакова ӱмыржӧ мучко ялозанлыкыште тыршен, ветеринар службышто ик эн опытан специалист. Сулен налме канышыш лекмекыжат тиде сомылкымак шуктен, а ӱмаште ик предприятийыште ороллан ыштен ончен. Кужу шыже-шошо йӱдым пайдалын эртараш кидпаша сайын полша. Тидымак шонен, Ежово села гыч ончычсо коллегыже Зоя Максимовнан темлымашыж дене кумылын келшен. …. «Носким пидаш тӱҥалынна да шӱдырышына уке. Тый моштет?» манын йодын тудыжо. «Моштем. Давай, колто!» – лийын вашмутшо. Садет кум мешак межым конден пуэн. Охраныштет йӱдвошт шинчетыс. Мый шӱдырен пытаренам, мынярже дене носким пидынам, да утларак ужашыжым Пиясир ял шотан илем администрацийым вуйлатыше Людмила Лебедева район администрацийыш намиен кодеден, тушеч Ежовыш наҥгаен шогеныт. Ик кечын Людмила Юрьевна ойла: «А мо, мемнан денат вет пидын моштышо ӱдырамаш-шамыч улытыс. Айда тарватена». Оролымаштак Непот ялыште илыше Роза Никифорова ыштен.
– Кушко тынар носким пидат? – икана йодо.
– Мемнан салтак-влаклан, – манам.
– Пу межетшым, мыят пидам.
Коктын пашажат писынрак кая, межетым эше шукырак колташ тӱҥалыныт. Ежовысо вате-влакын межыштат койын пыта.
Шке жапыштыже шорыкым кажне гаяк марий еш ашнен. Межым ял еда поген коштыныт, республикысе икмыняр районышто лӱмынак комбинатат лийын. Варажым шуко гана огыл колалтын: межым коремыш кышкена але йӱлалтена.
Роза Григорьевна шорыкым кызытат ашна. Лачак тиде поро пашалан межым шке озанлыкше гыч темлен. Тыге тӱҥалтыште Пиясир гыч Ежовыш колтылыныт, тушто эрыктеныт да кырыктеныт, а почкинчашыже да шӱдырашыже угыч Нурмашкак конденыт.
Ӱмаште шыже гыч тӱналын таче марте Пиясир ӱдырамаш-влак СВО-што улшо землякна-шамычлан 70 килограмм межым шӱдырен, носким пидын, мушкын коштен колтеныт. Татьяна Ивановна Ермакова, Роза Григорьевна Никифорова, Эльвира Станиславовна Пакулина, Татьяна Викторовна Федина, Нина Егоровна Смирнова, Татьяна Алексеевна Головина, Нина Петровна Чиркова, Раисия Ивановна Руштанова, а эртыше кечылаште эше Раисия Устиновна Ермакова, Надежда Александровна Мамаева, Фаина Аркадьевна Волкова… кажне кечын, мӧҥгӧ сомыл деч ярсен, кӱнчылавондым, име-шӱртым кучен шинчыт. Ятырыштын паша корнышт ялозанлык дене кылдалтше лийын, икте-весым сайын палат, кеч-могай сомылымат рӱжге ыштат – йод веле.
А 18 декабрьыште Нурма ял шотан илем кумдыкышто илыше-влакын Марий Эл деч черетат кугу гуманитар грузым погымо акцийыш ушнымо дене чумырымо арверыштым ял шотан илем администраций кӱлеш верыш наҥгаен. Ты кундемыште сеҥымашым лишемдаш полшаш кумылан-влак шагалын огытыл. Верысе администраций ден Нурмасе тӱвыра рӱдер нуным, мутлан, маскироватлыше сетьым пидаш чумырен шогат. Тиде сомылыш кугыеҥ-шамычат, школышто тунемше-влакат ушнат. А станокшым чолга марий Юрий Плотников ыштен пуэн. Йочасадыште тыршыше-влакат ӧрдыжеш кодын огытыл. Нунат шке гыч У ий вашеш шере кочкышым, газ баллоным, молымат ямдыленыт.
Татьяна Ивановнан палемдымыж почеш, чылажымат, тыгак шукерте огыл пидме 34 мужыр носкижымат Нурма селаште шочын-кушшо да кызыт элнам аралымаште кредалше землякыштын командиржын адресше почеш колтеныт.
Тек нине ава-кова, марий ӱдырамаш-влакын шокшо кумылышт почеш пидме носкишт патырна-влакын йолыштымат, чоныштымат ырыктат.
Светлана Пехметова
Авторын да Т.Ермакован фотошт.
