Марий Элым вуйлатыше Юрий Зайцев Республикысе курчак театрыште Йошкар-Оласе 28-ше №-ан лицейын выпускникше-влаклан аттестатым кучыктен, а ик эн уста да чолга-шамычлан – медальым.
Тений тиде общеобразовательный организацийым чылаже 65 ӱдыр-рвезе тунем пытарен, нунын кокла гыч 9 выпускникше шӧртньӧ м, а 5-ше ший медаль дене.
Марий Элым вуйлатыше самырык еҥ-влакым школым пытарыме дене саламлен, шкан ӱшанаш да лӱддымын ончыко ошкылаш тыланен.
«Таче моткочак тургыжландарыше кече. Те школ дене чеверласеда да ынде шке верч шкеак мутым кучаш, решенийым приниматлаш тӱҥалыда. Вес ошкыл – профессийым да ончыкылык корным ойырымаш. Тек корныштыда нелылык шагал вашлиялтеш, тек пеленда поро еҥ ден йолташ-шамыч шукырак лийыт!» – каласен Юрий Викторович да ешарен: 28-ше №-ан лицейын выпускникше-влаклан республикын ик эн виян тунемме верыштыже шинчымашым погаш йӧн лийын. Вет тыште йоча-шамыч эреак экзаменым сайын кучат, кӱкшӧ баллым погат да элнан ик эн ончыл вузлашкыже тунемаш пурат.
Регионым вуйлатыше туныктышо ден ача-ава-влаклан самырык тукымым ончен куштымыштлан, кӱлеш шинчымашым пуымыштлан тауштен да 14 выпускниклан аттестат дене пырля «За особые успехи в учении» медальым кучыктен.
Марий Эл вуйлатышын пресс-службыжын уверже негызеш Г.Кожевникова ямдылен
