Марий Эл вуйлатыше Юрий Зайцев Антинаркотический комиссийын заседанийжым тений икымше гана эртарен.
Погынышо-влак наркотик дене пайдаланыме да тудым закондымын кучылтмо ваштареш виктаралтше комплексный мере-влакым шуктымын лектышыж нерген мутланеныт. Нуно «Марий Эл Республик кумдыкышто 2017-2030 ийлалан правонарушенийым шижтарымаш» кугыжаныш региональный программыш пурат. Тыгак заседанийыште 2025 ийыште шуктышаш паша планым ямдыленыт.
Марий Элын тазалык аралтыш министрын алмаштышыже Татьяна Бастракова тӱҥ показатель-влак нерген ойлен. 2024 ийлан палемдыме план гыч 28 пунктшо дене паша мучашлалтын. Нунын кокла гыч утларакше наркотик дене пайдаланымым шижтарыме, реабилитаций да ресоциализаций нерген каласкалыше увер системым саемдаш да вияҥдаш кугу тӱткышым ойырыман. Тыгак кучылташ чарыме вещества-влак дене закон дене келшыдымын пайдаланыме факт-влакым пален налаш да тидым чараш оперативно-кычалме мероприятийым эртараш, уголовно-исполнительный инспекцийлаште учётышто шогышо осужденный-влак дене пашам ышташ виктаралтыныт.
Заседанийыште Марий Эл вуйлатыше палемден:
– Пайдаланаш чарыме вещества-влакым кучылтмо деч поснак кушкын толшо тукымым кораҥдаш кӱлеш. Тыгай нелылык улмым тӱҥалтыш жапыштак пален налме да шижтарыме пашашке туныктымо организаций-влакым чолганрак ушыман. Йоча-влакын тазалыкышт да ончыкылыкышт нерген азапланымаш ешын веле огыл, тыгак школын задачыже. Тиде пашаште туныктышо, психолог, социальный педагог-влак ик ой дене ыштышаш улыт.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
