Йошкар-Ола урем ден кудывечылаште корнылам лум деч йӱдшӧ-кечыже эрыктат. Тидлан мешайыше, кужу жап уремыште шогышо озадыме автомашина-влакым специализироватлыме стоянкылашкат наҥгаят манын колынам. А тудым кушко наҥгайыме нерген кузе пален налаш лиеш?
А.Михалев.
Йошкар-Ола.
Йодышлан Йошкар-Ола администрацийын пресс-службыштыжо вашештеныт:
– Транспорт средствым кушко эвакуироватлыме нерген Йошкар-Ола администрацийын сайтыштыже рашемдаш лиеш. Ешартыш увер кӱлеш гын, (83632) 45-12-11 (доб. 2502) телефон дене йыҥгырташ лиеш.
А теве пошкудо-влакын йыҥгыртымышт почеш, кудалтен кодымо автомашинам эвакуироватлаш огеш лий. Закон дене келшышын, тидлан посна радам уло. Ончыч муниципал контроль управлений автомашинам чынжымак кудалтен кодымо манын рашемдышаш. Тидын деч вара озажым тудым шке гыч кораҥдаш йодыт. Увер администрацийын сайтыштыже лиеш. Вара веле транспортым спецстоянкыш эвакуироватлат. Но озажлан машинажым ик вер гыч весыш кусарымылан роскотым петырашыже логалеш, тунам веле тудым пӧртылтен кертеш.
Фотом Йошкар-Ола администрацийын сайтше гыч налме.
