«МАРИЙ ЭЛ» ТАЧЕ ЛӰМГЕЧЕ

Ший пӱгыштӧ ший лудо шинча

У Торъял районлан- 100 ий

Ший пӱгыштӧ ший лудо шинча

Кандалге пасушто шулдыржым шаралтыше ший лудо шӧртньӧ оҥгыран да марий тӱрлеман ший пӱгыштӧ шинча, а йымалныже – ший кол. У Торъял районын гербшым ужында? Тушто ший лудыжо йӱдвел-касвел кундемысе марий калыкын шкешотан йӱлажым шуктымо пале веле огыл, эше аралтыш семын пуалтын. Шулдырысо йошкар ырес-влак Виче губернийын гербшын ужашыж семын районын тусо Яраҥ ден Уржум уездла дене историй кылже улмым ушештарат. А оҥгыран пӱгӧ тӱзатыме пашан вийжым да Озаҥ ден Яранск кокласе торгайыме корнын жапше годым район мучко эртымыжым шарныктара. Пӱгысӧ марий тӱрлем шкенан тӱвыранам перегымым, а кол ты кундемысе пӱя ден эҥерласе поянлыкым ончыктат.

У Торъял район  марий тӱвыра ден сымыктышлан да сылнымутлан шуко палыме еҥым пуэн. Тушто пашаче калык ила да изи огыл лектышыш шуын толеш, поснак – ялозанлыкыште. Лӱмгече идалыкысе ошкылат тидым пеҥгыдемда.

Районын икымше кварталысе пашажым кодшо ийысе тыгаяк жап дене таҥастарен ончалме гыч тыгай сӱрет почылтеш. Промышленный производство  23,3 процентлан, а ялозанлык производство чумыр налмаште 0,6 гын, организацийлаште 5,1 процентлан кушкыныт. Кугу да кокла кугытан организаций-влакын чоҥымо чумыр пашашт 32,2 процентлан туртын гынат, илыме верым 22,2 процентлан шукырак чоҥымо.

Изи предпринимательстве радамыш пурыдымо автотранспорт организаций-влакын грузооборотышт 23,1 процентлан иземын гынат, грузшым 17,2 процентлан шукырак шупшыктеныт. А пассажирым шупшыктымаш  тӱрыс налмаште 1,8 ганалан ешаралтын гын, пассажирооборот – 30,5 процентлан.

Изи предпринимательстве субъект радамыш пурыдымо организацийлаште общепит оборот 4,8 процентлан туртын гын, рознице торговльо оборот 12,0 процентлан кугемын.

Тӱрыс налмаште лӱмгече идалыклан ончымаште паша удан огыл ышталтын.  Сандене тыгеат манын кертына: У Торъял кундем ончыкылан ӱшан дене ила.

Ю.Исаковын фотожо.

Опубликовать в Одноклассники

Добавить комментарий