Медведево районлан – 80 ий
Ший ӱштыштӧ – йошкар тӱрлем
Кандалге тӱсан щитым ший ӱштӧ лопкан пӱчкеш, а тушто йошкар тӱрлем палдырна – тыгайрак Медведево районын гербше. Кандалге тӱсан щитысе ший ӱштӧ ончычсо Чарла уездын гербшым ушештара да таклан огыл: Медведево районын кызытсе кумдыкшо Чарла уезд радамыш пурен. Ший ӱштӧ районын ола воктенысе статусан улмыжым ончыкта, санденак Марий Элын рӱдолажым йырым-йыр ӱшталын. Руш ден марий тӱрлан келшен толшо йошкар тӱрлем тӱвыранан икгай шонымашан улмыжым да районысо калыкын шке историйжым пагалымым пеҥгыдемда.
Район шке пашаж дене эреак ойыртемалтын. Тений индеш тылзе жапыште 13969,3 миллион теҥгеаш промышленный продукцийым ыштен луктын, кеч тидыже ӱмашсе тыгаяк жап дене таҥастарымаште 80,4 процент гына лиеш.
А теве ялозанлык дене ӱмашсе индеш тылзаш кӱкшытым 5,5 процентлан эртен кайыме да чумыржо 6868,5 миллион теҥгеаш продукцийым ыштен налме, а ялозанлык организаций-влакын вийышт дене – 5472,1 миллион теҥгеашым, але 11,0 процентлан шукырак.
Ялозанлык предприятий-влак 34018,4 тонн шылым, але 0,3 процентлан утларак, ыштен налыныт да ужаленыт. Ты шотышто «Акашевский» сурткайык фабрике» ООО, «Шойбулакский» племзавод» ЗАО, «Самарский бройлер» ООО, «Семёновский» племзавод» ЗАО ойыртемалтыныт.
2023 ий 1 октябрьлан ончымаште тӱкан шолдыра вольык районышто 14635 вуй лийын, але ӱмашсе деч 1674 вуйлан шукырак.
Тӱкан шолдыра вольыкым ӧрдыктарыме суткаш кокла кугыт 878 грамм лийын, але 11 процентлан кугемын.
Ик ушкал деч лӱштымӧ кокла кугыт индеш тылзыште 7330 килограммыш шуын да 427 килограммлан ешаралтын. Чумыржо ты жапыште 38043,8 тонн шӧрым, 13 процентлан утларак, щупшылмо.
Районысо экономике ден социальный сферым вияҥдымашке индеш тылзыште тӱҥ капиталыш 5791,6 миллион теҥге инвестицийым, але 11,2 процентлан утларак, пыштыме. Ик еҥлан шотлымаште тӱҥ капиталыш инвестиций районышто кокла шот дене 85,6 тӱжем теҥге дене логалын, тидыже республикысе кокла кӱкшыт деч палынак кугу.
Январь-сентябрьыште кугу да кокларак предприятий-влакын вийышт дене 1824,0 миллион теҥгеаш, але 16,6 процентлан утларак, чоҥымо пашам шуктымо. Республикыште чоҥымо чумыр кыгыт гыч нунын ужашышт 28,1 процент наре лийын.
Районышто чоҥымо чумыр илыме вер кугыт индеш тылзыште 123,3 тӱжем квадратный метр, але ӱмашсе деч 9 процентлан утларак, лийын.
Шке гыч чоҥышо але чоҥыктышо-влакын вийышт дене чумыржо 77,5 тӱжем квадратный метр чоло 481 пӧртым нӧлтымӧ, тидыже ӱмашсын 91,9 процентше лиеш. Тыгай илыме вер чумыр кумдыкын 62,8 процентышкыже погына.
Шкат ужыда, экономикыште тӱҥ шотышто кушмаш, а южо шотышто мӧҥгештмашат палдырнат. Но моло район дене таҥастарымаште тыште экономике садыгак виянрак. Сандене идалык мучаш марте лектыш мыняр-гынат кушшаш. А ме тиде выпускышто, Медведево районын 80 ияш лӱмгечыж дене пайдаланен, тусо икмыняр пашаче ешын ошкылжо дене палдарена да ончыкыжо кугурак лектышыш шуаш тыланена.
Ю.Исаковын фотожо.
