Республикысе мӱкшызӧ-влак тений еш игым чот колтымым палемдат, тыгодымак чӱчкыдын толшо йӱрлан кӧра пайдале насекомый-шамыч пеледыш гыч нектарым налын огыт керт.
Шернур район Купсола гыч мӱкшызӧ Сергей Шабдаровын мутшо почеш, тенийысе ий поснак ойыртемалтше. Вӱдыжгылан кӧра нектарым ойырышо кушкыл сайын атыланыш, тыгодымак эн шуко мӱйым пуышо писте чот пеледе гынат, мӱкш нектарым налын ок керт.
Сергей Анатольевичын кок отарже уло: Купсолаште да Вӧдыр почиҥгаште.
– Таче, 7 июльышто, Купсолаште кок иге ешым кучышна да йӱр тӱҥалме деч ончыч омарташке колтен шуктышна, – ойла Шабдаров. – Ончыч южо ийын июнь мучаште иге еш ойырлымым чарна ыле. Тений отарем гыч чылаже коло иге еш чоҥештен каен. Ондак мӱкшиге шинчаш келыштарыме верыш апирой мазьым шӱралтет да еш тушко погына ыле, а тений кӱкшӧ пистыш чӱчкыдын чоҥештен кӱзен пӱтырналтын. А кӱкшӧ пистыште нигузе поген налаш. Кечат-кечат да чоҥештен каят. Мыланем тений латикымше классыш кайышаш кум йыгыр эргым-влак чот полышкалат. Нуно ынде чын мӱкшызӧ лийын шуыныт, ончымо радамым сайын палат, тидлан кумылыштат уло.
Сергей Шабдаров кок-кум-вич иге ешым иктыш колта, виян ешым ышта. Кок-кум корпусым шында. Тыгай куатле еш шукырак нектарым поген кертеш. Но тенийысе гай игечыште тыгай ешланат туткар толын. Мӱкшызын мутшо почеш, еш-влакым телылан ямдылыме годым тудо ик ганат сакыр сиропым ок пу. Теният тыгак ышташ шона. Мӱйым шагалрак кӱза, телылан шукырк кода. Эше палыме мӱкшызӧ чоҥештен кайыше иге ешым кучаш чодырашке яра омарта-влакым шындылеш да теният ик ешым веле огыл конден.
Тенийысе ойыртем эше тыгай: мӱкшигым посна яра омарташке колтымеке, тудо шкежак ешым ойырен. Тыгайже ончычсо ийлаште вашлиялтын огыл ыле.
Ончылгочак пале: ты гана мӱй ончычсо ийла дене таҥастарымаште шагалрак лиеш. Тугеже мӱйын акшат кенета кӱзен каен кертеш.
Снимкыште: Сергей Шабдаров.
Вячеслав Смоленцвын фотожо
