Тӱрлӧ чер ваштареш кучедалме да таза илыш-йӱлалан кумылаҥдыме мероприятий-влак кышкарыште 6-12 февраль Умшагӧргын тазалыкшым кӱлын эскерыме арня семын палемдалтеш.
Умшагӧргын тазалыкше ден шкешижмашна коклаште могай кыл? Тиде йодышым темлыме статьяштына рашемдаш тыршена.
Умшавомышын гигиеныже чумыр организмлан кӱлешан. Начар стоматологический тазалык – шӱм-вӱргорно черлан, сакыр диабетлан вияҥашышт кугу амал, тылеч посна тудо ава шӱм йымалне иланыше чукайлан зияным ыштен кертеш.
Умшагӧргын тазалыкше айдемын шкенжым шке аклымыж денат чак кылдалтын.
Капкылын моло ужашыштыже семын умшаштат пеш шуко бактерий уло, но тӱҥ шотышто – зияндыме. Умша – кочкышым шулыктарыме да шӱлымӧ органлашке пуртышо омса, сандене тудым лийме семын чаткан кучаш тыршыман.
Умшагӧргын яндарлыкшым кӱлын эскераш огыл гын, утыждене погынышо бактерий инфекцийлан вияҥаш амалым ышта, да пӱйым кариес авалта, пӱйшыл черлана.
Кӱпнымым шӧрышӧ, аллергийым чактарыше, корштымым лыпландарыше, шондым лукшо да депрессийым эмлыше гай южо эм шӱвыллан ойыралташ чаракым ыштат. Шӱвыл кочкышым мушкын колта, умшасе бактерий-влаклан кӧра ышталтше тӱрлӧ кислотан куатшым луштара, микроб-шамыч деч арала.
Умшавомышын тазалыкшым кузе арален кодаш?
- умшагӧргым тичмашнек эрыктыза;
- пӱйым эрыктыме щётко ден пастым тылзыште 1 гана деч шуэн огыл вашталтыза;
- пӱй коклам эрыктыме шӱртӧ дене пайдаланыза;
- стоматолог деке коштса;
- кислотан да шере продуктым лийме семын шагалрак кочса.
Умшавомыш черланыме деч мом ыштыман?
- рационым пойдарыза;
- пӱйым кечеш 2 гана (эрдене кочмо деч вара да малаш вочмо деч ончыч) эрыктыза, пӱй коклам порсын шӱртӧ дене йытырайыза, пӱйшылымат массажым ыштыме семын йыгыза;
- пӱй ден умшагӧргым стоматологлан эрыктыктыза;
- пӱйшылын черланаш тӱҥалмыжым шижмеке, вигак специалист деке кайыза;
- умшавомышын тазалыкше яндар пӱй гыч тӱҥалеш. Тудым пасте ма порошок дене эрыктыме деч вара умшагӧргым свежаҥдыше средстве але кушкыл настой дене шӱалтыза.
М.ИВАНОВА ямдылен
