УВЕР ЙОГЫН

Шарныза, еҥыным тӱкаш огеш лий!

«Вандал-влак мемнам ынде нимо денат огыт ӧрыктаре манын шонымо годым, очыни, шекланаш кӱлеш, молан манаш гын нуно тугай пундаш гыч пералтен кертыт – ушдымо-шамычын тымарте ыштыме моло осал пашашт йочасадла веле чучеш», – шыдыжым шылтыде манеш Звенигово районысо Красногорский посёлкышто илыше Анастасия Хурамшина.
А пашаже теве кушто. Шукерте огыл посёлкысо Николай Чудотворец лӱмеш черке воктене Кугу Отечественный сарыште вуйым пыштыше-влаклан Шарнымаш скверым уэмден олмыктеныт, да тушто моткочак ару да волгыдо лийын.
– Красногорский кундемыште вандализмын вирусшо ажгынен ала-мо – эртыше кеҥежым тӱзатен чоҥымо Кожласола ер серым верын-верын вигак гаяк локтыльыч, ынде кадыр кидышт Шарнымаш скверышкат шуын: у софит-влакым, манмыла, шылыштге кӱрышт наҥгаеныт. Южыжым кӱрлын налын кертын огытыл да электровоштырыштым пӱчкын ойыреныт, – шӱм-чон коржын каласкала патриот шӱлышан Анастасия. – Еҥыным налаш огеш лий манын, арам огыл изинек туныктат. Общественныйжат еҥынланак шотлалтеш вет, вандал-влак! Йӧршын орадыш каен улыда мо? Вет тиде обелиск! Кум тылзе гыч Сеҥымаш кечым палемдаш тӱҥалына. Кугу Отечественный сарыште кредалше коча-кова-влак кажне гаяк ешыште лийынытыс! Нунын ончылно нимынярат намыс огыл мо? Тыгай осал пашам ыштыше еҥым палыше-влак улыт гын, мыланем лично увертараш йодам. Лӱмдам нигӧланат ом каласе. А шкеже тиде уверым правам аралыме органыш пуэм. Йолташ-влак, айста чурийнам огына йомдаре, чыла шотыштат айдемак лийын кодына. Посёлкына икте веле, сандене мо тушто уло гын, айста чылажымат арален кодена, тӱзатен толына!
Теве тыгай паша… Анастасиян каласкалымашкыже тетла нимом ешараш, шонем. Ӱшаныме шуэш, вандал-влакым муыт да закон ончылно мутым кучаш шогалтат.
М.ИВАНОВА
А.Хурамшинан фотожо

Опубликовать в Одноклассники

Добавить комментарий