Йошкар-Олан 441 ияш лӱмгечыжым палемдыме мероприятий коклаште ик эн ойыртемалтшыже «Пеледыш тӱня» ончер лийын.
Тудо Сеҥымашын ХХХ идалыкше лӱмеш тӱвыра полатыште кок кече шуйнен. Такшым, тыгай ончер кажне ийын эрта да кажне гана пеледышым ончен куштышо-влакым чумыра. Тушко рӱдолаште да ола воктене илыше сад- пакчазе-шамычат кумылын ушнат. Иктышт пеледышым ужалат гын, весышт налаш, нуным ончен куштымаште иктаж-мом уым пален налаш толыт. Мутлан, садым кузе сылнын, кызытсе жаплан келшышын тӱзаташ лийме йодыш шукыштлан оҥай.
Тений ончер Кугу Отечественный сарыште сеҥымашлан 80 ий теммылан пӧлеклалтын ыле. Сандене мероприятийыш ушнышо-влак тематике дене келшыше композицийлам ямдыленыт. Ончерыш пурымаштак кум кугу гвоздикым молан вераҥдымым вик умылет. Вет ты пеледыш мемнан элыште ала-молан дыр ойгын символжылан, шарныктыш пеледышлан шотлалтеш.
Южо композицийжым ончет, да шинчвӱдетат толеш. Озаже-влак нунын гоч сарыште вуйым пыштыше родо-тукымыштым шарныме нерген ойлынешт, санденак фотсӱретыштымат кучылтыныт. Марий Эллан 105 ий теммылан пӧлеклалтше композиций-влакат лийыныт. Пеледше клумбо, кушкыл гыч ыштыме персонаж-влак, бонсай, янда ате кӧргыштӧ кушкыл гыч чумырымо флорариум, келге сюжетан композиций-влак ӧрыктареныт.
«Пеледыш тӱня» ончерын организаторжо-влак кажне гана чолга участник-влакым палемдат. Тений икымше верыш Йошкар-Оласе рӱдӧ тӱвыра да каныме парк лектын.
Светлана Носован фотожо.
