Кеҥеж мемнан дене чеверласыш. Туге гынат августын пытартыш кечылаже да шыже тӱҥалтыш мемнам шокшыж дене куандарышт. «Марий кеҥеж» фестивальын мероприятийлаже йоча ден ача-ава-шамычын шарнымашешышт шуко жап илаш тӱҥалыт. Марий Эл вуйлатыше Юрий Зайцевын тиде проектше ынде икмыняр ий Йошкар-Олаште илыше-влакым куандара. Тудо шукыштлан моткоч лишыл лийын, молан манаш гын кудывечылаште эртыше мероприятий пошкудо-шамычым поснак лишемда.
Теве 27 августышто Йошкар-Оласе Ураев бульварысе 8-ше №-ан пӧртын кудывечыштыже «Марий кеҥеж – мемнан кудывечыште» еш фестиваль гӱжлен. Тушко ача-ава, йоча-влак, эсогыл коча ден кова-шамычат ушненыт. Аниматор-шамыч чылаштымат тӱрлӧ модыш дене модаш, пырля кушталташ ӱжыныт. Кумылан-шамыч аквагрим полшымо дене шӱргыштым сӧрастарен кертыныт.
«Марий кеҥеж – мемнан кудывечыште» проектыш Йошкар-Оласе социально кӱлешан проект-влакын координаторышт кумылын ушнат. Йоча-влакын модмышт годым нуно калык дене мутланат, лекше йодышлан вашештат, йӧн лийме семын полшат. Тидымак Марий Эл Кугыжаныш Погынын депутатше Максим Бронников пеҥгыдемден каласен.
Лидия ШАБДАРОВА
