Тыгай темлымаш дене Йошкар-Оласе «Марий кумалтыш» общинын еҥже Ираида Степанова соцкыл лаштыкыште йолташыже-влак деке лектын.
Тудо воза: «Пагалыме кугу онаеҥ Актуганов Вячеслав Михайловичын мемнам коден кайымыжлан идалык утла эртен. Кийыме вержым тӧрлатен, шарныктыш кӱм шогалташ жап толын шуын. Тудо калыкна верч моткоч шуко вийжым пыштен, вуй савен кумал шоген, ял кумалтыштат, еш кумалтыштат, тӱня кумалтыштат. Калыкым шке шинчымашыж дене кумылын палдарен, самырык-влакым туныктен шоген. Шке мутшым книгашкат возен да икмыняржым савыктен шуктен. Шуко поро пашажым шарнен, тауштен илена.
Кызыт Агния пелашыже Вячеслав Михайловичын шӱгар ӱмбакыже памятникым вераҥдыме паша радамым тарватен. Сандене Ираиада Степанова йолташыже-влак дене тудлан полшаш кумылым ончыктен, калык деке ӱжмаш дене лектын. Окса надыр дене полшаш кумылан-влак, сбербанк онлайн дене пайдаланен, Агния Ильинична Актуганован +7-927-879-21-55 номер гоч колтен кертыт.
