Марий Элым вуйлатыше 1941-1945 ийласе Кугу Отечественный сарын участникше-влаклан шарныктышым почмаште участвоватлен.
Памятникым Килемар районысо Красный Мост посёлкышто чоҥымо. Проектым верысе тӱҥалтышлан полшымо программын кышкарыштыже илышыш пуртымо.
Юрий Зайцев тыгай объект-влакын поснак кызыт, нацист-шамычын Российын эрыкшым поген налаш тыршымышт жапыште, кӱлешан улмыштым палемден.
«Тиде памятникым ял калыкын ыштымыже куандара. Кугу Отечественный сарыште вуйым пыштыше-влакым шарнаш кӱлеш. Нуно мемнан еҥна, мемнан сарзына улыт. Кызыт Россий угыч мемнам сеҥаш, элнам пытараш шонышо фашизм, неонационализм, касвел эл-влак ваштареш кучедалме военный стройыш шогалын. Ме элнан эрыкшым, йоча-влакын юарлен воштылмыштым, тынысле илышым кузе нелын пӧртылтымӧ нерген мондышаш огынал. Тиде шарныктыш патриотический мероприятий-влакым эртарыме рӱдер лиеш манын ӱшанем», – манын Ю.Зайцев.
Килемар район администрацийын вуйлатышыже Татьяна Обухован каласкалымыж почеш, Кугу Отечественный сар пагытыште муниципальный образований гыч фронтыш 3 тӱжем наре еҥ каен, ты чот гыч 2 тӱжем наре сарзе кредалме пасула гыч пӧртылын огыл.
Т.Обухова Марий Элым вуйлатышылан «Верысе тӱҥалтыш-влак» программым илышыш пурташ полшымыжлан тауштен, вет корным чоҥымо, йоча площадке, общественный кумдык да шӱгарла-шамычым тӱзатыме паша лачшымак тудын кӱшеш шукталтеш.
Ю.Зайцев памятник ончылнысо постаментыш пеледышым пыштен, вара Юмын архистратигше Михаил лӱмеш черкыш пурен лектын.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
