Кумдан чапланыше флейтист, РСФСР-ын сулло артистше В.Шапкиным шарныме лӱмеш республик кӱкшытан конкурс Йошкар-Олаште эртен манын ойлат? Тушко кӧмыт ушненыт да сеҥышыш кӧ лектын?
П.Романов,
Йошкар-Ола.
Йодышлан И.С.Палантай лӱмеш тӱвыра да сымыктыш колледжын Национальный гимназийыштыже тыгайрак вашмутым пуышт:
– 10-11 апрельыште И.С.Палантай лӱмеш тӱвыра да сымыктыш колледжын Национальный гимназийыштыже флейтист, РСФСР-ын сулло артистше Виталий Владимирович Шапкиным шарныме лӱмеш икымше гана республик кӱкшытан конкурс эртаралтын. Тушко йоча сымыктыш школлаште духовой да ударный семӱзгарым шоктышо-влак ятырын ушненыт. Чылаже 47 солист, 9 ансамбль да 4 оркестр мастарлыкым ончыктеныт. Участник-влакын ийготыштым шотыш налын, жюри тӱрлӧ номинацийыште аклен. Гран-прим Национальный искусство гимназийын тунемшыже Эстай Веткин кларнетым шоктымыж дене сеҥен налын. Преподавательже – Людмила Александровна Майкова, концертмейстерже – Анна Владимировна Созонова.
А.Байкова ямдылен
Фотом гимназийын архивше гыч налме
