Тыге маналтын 27 октябрьыште В.И.Ленин лӱмеш тӱвыра полатыште эртаралтше поро кумылым ончыктымо концерт.
Тушеч погынышо шийвундын икмыняр ужашыжым спецоперацийыште улшо-влаклан полшымо шот дене колташ палемденыт. Мероприятийым Марий калык конгресс эртарен. Тудым Эдуард Иманаев вуйлата. Каласен кодыман, ты организаций тыгаяк концертым кодшо шыжым эртарен ыле.
Моткоч кугу таум каласыме шуэш ты кечын сценыште шке усталык дене куандараш келшыше артист-влаклан. Российын сулло, Марий Элын калык артистше-влак да марий эстрадын шӱдыржӧ-влак сылне мурышт, куштымашышт да тӱрлӧ семӱзгар семышт дене куандареныт. Республикысе Марий тӱвыра рӱдер пеленысе шкешотан «Падыраш» йоча, тыгак Волжский районысо «Юл сем» ансамбль-влакымат палемден кодыман. Кажне участникшын мурыжо шочмо кундемнам, элнам, лишыл еҥ-влакым йӧраташ, аклаш, пагалаш кӱлмӧ нерген ушештарен.
Концертыш билетым Марий Эл правительстве председательын икымше алмаштышыже Михаил Васютин налмыж годым тыгерак каласен: «Республикыштына тыгай шӱлышан мероприятий-влакым эртарымым сайлан шотлыман. Тыге тышке толшо кажне еҥ военнослужащий-влаклан полшаш да сеҥымашке шуаш шке надыржым пыштен кертеш. Ты кастене артист-влакын мастарлыкыштым ончаш веле огыл, жапым оҥайын да пайдалын эртараш йӧным ыштымыштлан организатор-влаклан таум ойлем».
«Моткочак шуэш илымем» Виктор Апталиковын йоҥгалтарыме мурыжо ты кастене залыште шинчыше кажне еҥын чонышкыжо логалын, очыни. Эшежым концерт тӱҥалме деч ончыч ойган увер шарлыш: мемнан ик эн йӧратыме мурызына Татьяна Денисован Иван эргыже СВО-што колен. Тудо 28 ияш лийын. Шорт-трек дене Марий Элын чапшым арален, Россий спортын мастерже профессионал карьерым мучашлымеке, тренерлан ыштен. Йол ӱмбаке шогалтымеке, кумда илыш корныш луктын колтымеке, шке эргым йомдараш авалан ой пеш йӧсӧ. Татьяна Яковлевна, ме тендан дене пырля ойгырена да моткоч чаманена. Концерт кечын артист-влакымат ты шучко увер чотак ойгандарен.
Концерт деч вара соцкыл лаштыклаште тыгай мерориятийым эртарымылан Марий калык конгрессын еҥже-влаклан ятыр тауштымаш сералтын. Иктыжым ушештарымак шуэш. «Ме, ава-влак, «Геройын пелашыже. Геройын аваже» проектын участницыже-шамыч, «Шӱмбел Марий Эл» концертын организаторжо да артист-влаклан кугу таум ойлена. Моткоч чоным вӱчкышӧ да кӱрыштшӧ кас ыле, муро гоч эргына дене пуйто шомакым вашталтышна, ойгынам луштарышна. Концерт шочмо элым, марий кундемнам йӧратыме кумылым почын пуыш, икоян, икте-весым пагален илаш ӱжӧ. Ме пырля улына – виян лийына».
А.Байкова, С.Носова
Снимкыште: концерт годым.
И.Речкинын фотожо
