Марий Эл радион кодшо арнясе хит-парадыштыже «Шӱм куан» ансамбль кокымшо верым айлен. Ты коллектив дене кӱчыкын палдарена.
«Шӱм куан» ансамбль Звенигово оласе «Голубая мечта» тӱвыра да каныме рӱдер пелен ятыр ий пашам ышта. Ты коллективым 2018 ий гыч марий шӱлышан чолга ӱдырамаш Светлана Фёдоровна Булатова вуйлата.
Ансамбльыште – куд участник. Нуно верысе интернат-школышто, кондитер фабрикыште пашам ыштат, ороллан тыршат, икмынярынже сулен налме канышыштат улыт.
– Репертуарыштына тӱрлӧ темым авалтыше кудло наре эстраде муро уло. Утларакше Лидия Иксанова ден Антонида Щербакован почеламутыштлан эҥертена. Семым возаш Валерий Садретдиновлан ӱшанена, – палдара Светлана Фёдоровна. – Пытартыш жапыште семмастар Вячеслав Андреевич Осипов дене кылым кучена. «Таче мураш тӱҥалына» мурынан мутшо ден семжымат тудак возен, аранжировкым Валерий Садретдинов ыштен. Муро пеш весела, кумылым нӧлтышӧ, садлан калык эреак куанен вашлиеш.
Фотом ансамбльын альбомжо гыч налме
