12 мартыште Марий тӱвыра рӱдерын усталык коллективше-влак «Кичиер» санаторийыш тыгай концерт программе дене миен коштыныт.
Каныме да тазалыкым пеҥгыдемдыме рӱдерыште посна сарзе операцийыште улшо участник-влакын авашт але пелашыштлан пырля каналташ йӧным ыштыме.
«Чон оҥгыр» фольклор, «Падыраш» (вуйлатыше – Марий Эл тӱвыран сулло пашаеҥже Эльвира Петрова) йоча ансамбль-влак калыклан моткоч келшеныт. Йоча ансамбльын участникше-шамыч туныктышышт семынак тӱмырымат чаплын пералтат, гармонь денат шоктен-мурен кертыт. Теве Богдан Тымбаршев ден Артем Ягодаров гармоньым ансамбльыш толмо годсек йӧратен шынденыт, тунем шуыныт, гармоньчо семын тӱрлӧ конкурсышто вийыштым тергат. А Кирилл Куклин ден Рамзан Килпинэн тӱмырым моткоч мастарын пералтат. Залыш погынышо калыке рвезе-шамычым совым кырен вашлийын.
Данила Коротков марий рэпыште шкенжым кычалеш, мурыжо-влак шкешотан улыт.
Рӱдерын вуйлатышыже Ирина Якаева, элна верч пеҥгыдын шогышо салтак-влакын авашт ден пелашыштлан тауштен ойлен, мурсемым пӧлеклен.
А. А. Андреева, Ачамланде сарзе еш-влакын Волжский районысо муниципал штабым вуйлатыше:
– Марий тӱвыра рӱдерын эртарыме концерт мемнан составлан келшыше. Тыште шукынжо ава-влак улыт. Нунылан эргышт нерген шарнымашым кондышо программым ямдылыме. Репертуар пеҥгыде, ӱшаным пуышо. Чылалан тазалыкым тыланем.
Раисия НИКОЛАЕВА
Авторын фотожо
