Тыге сылнын маналтын Марий Эл искусствын сулло деятельже, Марий Эл Кугыжаныш премийын лауреатше, М.Шкетан лӱмеш Марий драме театрын художественный вуйлатышыже Василий Александрович Пектеевын 70 ияш лӱмгечыжлан пӧлеклалтше
концертше.
Шочмо кечыже 23 январьыштак лийын гынат, йыргешке датыже лӱмеш пайрем 28 апрельыште эртаралте. Тымарте тудын лӱмгечыжлан пӧлеклалтше фестиваль шуйнен. Кум тылзе утларак жапыште лӱмлӧ режиссернан шындыме лу наре спектакльжым театрыште модын ончыктеныт. А тиде концерт фестивальым мучашлыш.
Экраныште Василий Александровичын фотографийже йымалне «Василий Пектеев 70» манын возыман сӱретым вераҥдыме. Сценыш пайрем оза лекте. Тудым калык совым рӱж кырен вашлие. Тӱҥалтыште шке илыш корныж: кушто тунеммыж, пашам ыштымыж – нерген кӱчыкын ойлыш. Тыгодым моткочак чонеш логалшын палемден кодыш:
– … Но кушто гына кошталтын огыл: йот эллаштат, тӱрлӧ олаштат – мыланем марий йылме деч сылне ик йылмат уке. Марий мланде деч шергакан иктат уке.
Тиде жапыште шкенжын веле огыл, ончышо-влакынат, очыни, чыланнан кумылна тодылто. Санденак еҥ-влак, «ме тыгай улмыда дене кугешнена» манмым ончыктымо семын совым уэш рӱж кырышт.
Да тыгай кумылан улмыжо Василий Александровичын возымо чыла гаяк почеламутыштыжо палдырна. Ик эн чот тиде «Канде ӱжара» почеламутыштыжо шижалтеш. Кӧ лудын але вараже мурым колыштын гын, а тудлан вараже семым Татьяна Ямбердова возен, мурым Василий Александрович шкеже йоҥгалтара, товатат, иктат ласка кодын огыл. Вет кажне мутшо тунар чонеш логалше – шинчавӱд шкежак шӱргыначка мучко йоген вола. А тугеже шкеже тудым кузе, могай шижмаш дене возен?! Лӱмгече концертыштыже тиде мурым Василий Александрович Светлана Строганова дене пырля мурыш.
«Омо» сборникышкыже пуртымо тиде да моло почеламутшат тыгаяк виян улыт. Шарнем, 2010 ийыште книгаже эше лектын веле, «Марий Эл» газетнан тунамсе тӱҥ редакторжо, кугу йолташыже Александр Саликович Абдулов коллективышкына вигак манме гаяк ӱжын ыле. Сборникше утыжым кӱжгӧ огыл, сандене Василий Александрович шукыжым лудын ончыктыш. А вара икмыняр жап гыч радиошто Санюн Вачи лӱм дене «Канде ӱжара» икымше мурыжо йоҥгалте.
Лӱмгече касыштат, мутат уке, тудын почеламутшо-влак йоҥгалтыч. Нуным Олег Кузьминых, Павел Ефимов, Акпарс Иванов лудыч. А почеламутшылан возымо муро-влакым Иван Смирнов, Роман Алексеев, Светлана Строганова, Марина Воронцова, Иван Соловьев мурышт. Евгений Сергеев ден Сергей Пчелкин тиде радамыш ушнышт.
Икымше ужаш сылнымут ден сылнысеман ыле гын, кокымшышто Василий Александровичым моткочак шуко поро йолташыже, сай палымыже-влак лӱмгечыж дене саламлышт. Марий Элын Тӱвыра, печать да калык-влакын пашашт шотышто министерстве лӱм дене министрын алмаштышыже М.Матвеев саламлыш. Г.Камал лӱмеш Татар академический театр, Карелийысе национальный театр гыч гын саламлымашан телеграмме-влак толыныт. Нуным вӱдышӧ лудын пуыш. А Карелий ден Коми республикласе музыкально-драматический театрын коллективышт-влак видеосаламлымашым колтеныт. К.Иванов лӱмеш Чуваш академический театрын директоржо Е.Николаева шкежак сценыш саламлаш лекте. Нине театрыште Василий Александрович режиссер семын пашам ыштен.
Эн шукын Морко кундем гыч толыныт ыле. Тиде – муниципал образований вуйлатыше С.Иванова, В.Лазарев лӱмеш калык академический хор, Йошкар-Олаште ты районысо землячествын еҥже-влак. Умылаш неле огыл, вет Василий Пектеев – Морко мландын эргыже.
Театрын коллективше ойыртемалтше пӧлекым ямдылен – сценыш Шкетан театрын тӱжвал сынжым ончыктыман кугу тортым луктыч.
Саламлыше-влак чыланат марий калыкнан тыгай тале шочшыж дене кугешнымышт нерген ойлышт, талантшым палемдышт. Меат тиде саламлымашыш уло кумылын ушнена!
Любовь Камалетдинова
Фотом М.Шкетан лӱмеш Марий драме театрын сайтше гыч налме
