М.Шкетан лӱмеш Марий национальный драме театрын артистше-влак 3 апрельыште «Гамлет. Машина. Цемент» спектакльым Моско гыч «Золотая маска» премий верч таҥасыше-влакым аклыше комиссийлан ончыктат.
Тиде спектакльым молан кӧра ончыман? Ты йодышлан театрын тӱҥ режиссёржо Василий Пектеев тыгерак вашештыш:
– Шекспирын «Гамлет» пьесыже тӱня мучко эн чот палымылан шотлалтеш. Ты произведений почеш шындыме спектакльын театр репертуарыште улмыжо марий театрын кӱын шумыж нерген ойла. Пьесыште возымо историйым марий ялыш кусарыме. Калыкнан тыгай йӱлаже уло: айдемын колымекыже, нылле кечыжым эртарат, уштен, ӱстел йыр шинчыт… Тиде спектаклят марий йӱла дене вӱдылмӧ.
Спектакльыште Шекспирын семынак кусныл коштшо артист-влак улыт.
Тӱҥ геройын аваже, марийжын колымекыже, вигак марлан кузе лектын, сӱаным ыштен кертеш? Мо тиде тугай? Тиде чынжымак шотдымо але ужалалтше ӱдырамаш? Аван койышыжо кеч-могай гынат, шке икшывыжлан тудо – эн шерге. Сандене режиссёр нине йодышлам шымла: кузе аваже тидым ыштен кертын? Молан? Спектакльыште Гамлет аважым умылаш тырша.
Молан да кузе ӱдырамаш тыге ыштен кертмым умылтараш кокымшо действийыште «Цемент» роман гыч ужашым налын ончыктымо.
Постановко марий шӱлышан, тачысе илышлан келшыше, чоным кӱрыштшӧ, шонаш таратыше. Арам огыл тиде спектакль дене театр коллективым Екатеринбургышто, Москошто да Озаҥыште эртаралтше фестивальлаш ӱжыныт. Чыла вережат калык зал тич погынен, мемнам шокшын да кӱкшын аклен. Садлан тудым ончыман да умылаш тыршыман.
А.БАЙКОВА
