Лаштыкнан тачысе унаже – М.С.Степанов лӱмеш Морко районысо тӱвыра да каныме рӱдерын йӱк режиссёржо Сергей НИКОЛАЕВ.
Сергей Валерьевичым районышто эртаралтше ятыр тӱвыра мероприятийыште аппаратур воктене шинчышым ужаш лиеш. Тудо эше мурылан семым воза, аранжировкым ышта да икмыняр семӱзгарым шоктен мошта!
Тӱвыра аланыш толмо корныжо могайрак лийын? Возымо мурыжо-влакым кӧмыт мурат? Нине да моло нерген кумданрак материалыште лудаш темлена.
Йоча пагыт
С. Николаев Морко районысо Нӧрепсола ялеш шочын-кушкын, а кызыт ешыж дене райрӱдыштӧ ила. Усталык шӱлышан рвезе Кугу Кожлаялысе тӱҥалтыш школышто тунеммыж годымак хорышто мурен.
– Эше нулевой классыште талантан икшыве-влакым Икымше номеран музыкально-художественный школ-интернатыш тунемаш пураш ончаш толыныт да мылам мияш кӱштеныт. Каяш торешланенам. Кумшо ийын уэш толмекышт ача-авам Йошкар-Олаш каяш кутырыктен сеҥеныт, – порын шарналта йоча годсо пагытшым Сергей Валерьевич. – Антонида Гурьевна Эшкининан виолончель классыштыже мастарлыкым шуаренам. Адакшым баян классыште тунеммем шуын. Школыш мийымеке, Антонида Гурьевнан баяным чаплын гына шоктен моштымыжым ужынам да чылт «шуленам». Но туныктышемын «Виолончельым шокташ тунемат гын, слухет виян лиеш» манын каласымыже шонымашем вашталтен кертын.
Чолга рвезе школын духовой оркестрыштыже альтым, тенорым да моло семӱзгарымат шоктен.
Школ деч вара С.Николаев И.С.Палантай лӱмеш музыкальный училищыште шинчымашым поген. Нылымше курсышто тунеммыж годым Озаҥ оласе консерваторийын эртарыме Почмо омса кечышкыже миен коштын. Виолончельым шоктымыжо тусо профессорлан чот келшен да садыже «Моло экзаменжым «кокытанлан» эртет гынат, садак вузыш налам» манын.
– Тыгай шомак, мутат уке, мыйым «шулдыраҥден». Тиддеч вара училищыште шым-кандаш шагат дене семӱзгарым шоктен шинченам, чыла произведенийым шинчам кумен шоктен моштенам, – каласыш С.Николаев.
Но училищым чыла «визытанлан» тунемын лекше самырык специалист тӱрлӧ амаллан кӧра шонымашкыже шуын кертын огыл. Садлан тудо шеледыме почеш икмыняр жап Советский районысо Топкайэҥер посёлкысо да Михайловка ялысе тӱвыра пӧртлаште пашам ыштен.
«Энсул», «РИФиС»
Армий гыч пӧртылмекыже С.Николаев Морко тӱвыра пӧрт пеленысе «Энсул» ансамбльын аккомпаниаторжо лийын. Семӱзгарым шоктен мурышо чапланыше коллективым тунам Михаил Кузнецов вуйлатен.
МАТЕРИАЛЫМ ТИЧМАШНЕК «МАРИЙ ЭЛ» ГАЗЕТЫШТЕ ЛУДАШ ТЕМЛЕНА!
А.БАЙКОВА
Фотом еш альбомжо гыч налме
