Марий Элым вуйлатыше «Лӱдыкшыдымылык школ» XVII всероссийский таҥасымашын сеҥышыже-влак дене вашлийын. Амалжат кугу: Марий Элын кок командыже Юл кундем федерал округышто абсолютный чемпион лӱмым сеҥен налын!
Тыгай кӱкшытыш республикна ты таҥасымашын эртарыме историйыштыже икымше гана шуын.
«Профессионализмым, тыршымашым, кугу кӧргӧ куатым ончыктымылан кӱкшӧ акым налме дене тендам саламлем. Тыгай сеҥымаш-влак мыланна моткочак кӱлыт. Шке жапыштыже чыла тидым «спортын прикладной видше» маныныт. Пытартыш жапыште тудын дене профессионал кӱкшытыштӧ паша ышталтмылан куанем. Спортын ты видше нелылан шотлалтеш, сандене виян гына лийме огеш сите, чыла могырымат моштымаш кӱлеш. Чыла тиде – кугу паша. Сандене сеҥымашда кугу пагалымашым шочыкта. Ончыкыжымат чемпион лӱмым, элнан да республикнан тистыже-влакым кугешнен нумалшаш тыланем», – каласен Юрий Зайцев.
«Роза ветров» йоча да самырык-влакын рӱдерыштын кугурак методистше, «Лӱдыкшыдымылык школ» всероссийский мер толкынын регионысо пӧлкажын председательже Александр Алафузов Марий Элым вуйлатышылан сборный командылан материальный могырым полышым пуымылан тауштен ойлен. Тудын палемдымыж почеш, тидлан кӧра илен лекме маршрутлан кӱлеш оборудованийым налме да ямдылалтме.
Таҥасымаш тений 1-10 августышто Москва областьысе Ленин округын Пожарно-спасательный рӱдержын тунемме полигоныштыжо эртен. Тушто 8 федеральный округ гыч 18 команде вийжым терген. Лу кечыште школышто тунемше 11-17 ияш ӱдыр-рвезе-влак ОБЖ предмет кышкарыште шкеныштым тергеныт. Тыгак таҥасымаште тыгай дисциплине-шамыч лийыныт: «Нелылыкан полоса», «Комбинироватлыме пожар эстафете», «Комплексный силовой упражнений», «Кросс-эстафете, 1 километр», «Кычалме-утарыме паша», «Илен лекме маршрут», «Пасу условийыште бытым организоватлымаш».
Вашлиймаш годым мемнан чемпион-влак чыла тидын нерген веле огыл ойленыт, тыгак ончыкылык шонымашышт дене палдареныт. А Марий Элым вуйлатыше кажныж дене кидым кучен чеверласен.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.