Марий Элым вуйлатыше Юрий Зайцев республикыштына «Сеҥымаш диктант» тӱнямбал акцийыш ушнен.
Кугу Отечественный сарлан пӧлеклалтше мероприятий Калык-влакын келшымаш пӧртыштышт эртен.
– Диктантым эртараш Марий Элыште 283 площадкым ыштыме, нунын кокла гыч эн тӱҥжӧ – Калык-влакын келшымаш пӧртыштышт. Мый денем пырля диктантым «Единая Россия» партийын депутатше,специальный военный операцийын участникше-влак да молат возеныт. Республикыштына тиде акцийыш чылаже куд тӱжем утла еҥ ушнен, – каласен регионым вуйлатыше.
Марий Эл Кугыжаныш Погынын председательже Михаил Васютин палемден: ий гыч ийыш участник-влакын чотышт шукемеш. Ӱмаште диктантым 61 кугыжаныш гыч кок миллион тула еҥ возен гын, тений тыгай площадкым 90 утла элыште ыштыме. «Эн куандарышыже – акцийыш самырык-влакын ушнымышт», – каласен тудо.
Видеокыл йӧн дене участник-влак дене Россий историй обществын председательже Сергей Нарышкин вашлийын да акцийын кӱлешлыкшым палемден.
Ӱмаште мемнан республикыште акцийыш вич тӱжем еҥ ушнен. Кажне регионышто историйым палыше вич еҥым ойырат, федерал кӱкшытыштӧ 20 сеҥышым палемдат. Сеҥыше-влак Москвасе Йошкар площадьыште 9 майыште эртыше Сеҥымаш парадыште почётан уна лийыт.
Марий Эл Республикым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
