КУЧЕМЫШТЕ ОБРАЗОВАНИЙ УВЕР ЙОГЫН

Сеҥыше да туныктышо-влаклан – грант

Марий Элым вуйлатыше Юрий Зайцев Юл кундем федерал округышто школышто тунемше-влаклан Россий кӱкшытан интеллектуал олимпиадын пытартыш этапыштыже призёр-шамычлан да нунын наставникыштлан грантым кучыктен.

Республикыште олимпиаде толкынышто тыршен пашам ыштыше-влаклан  тудо каласен:

– Тиде куштылго огыл уш-акыл «кучедалмаште» лидер лияш моткоч кугу паша ышталтын. Кугу таум йоча-влакым ямдылыше туныктышо-влаклан каласыме шуэш. Кеч-могай тыгай таҥасымашыште наставник кӱлеш. Лач тудо кӱлеш годым полша, ой-каҥашым пуа да мокталтен ойла.

Юрий Зайцев тунемше-шамычлан эре ончыко каяш тыланен.

– Олимпиаде – илыш корныштыда шуко сеҥымаш гыч иктыже. Кунам чынжымак шуко пашам ышташ тӱҥалат да сулен налме наградым налат, тиде эшеат ончыко каяш кумылаҥда. Пеленда улшо-влакым – ача-авам, туныктышо-шамычым – ида мондо. Тунам чыла шонымашда шукталтеш, – палемден регионым вуйлатыше.

Мучашлан тудо призёр ден наставник-влаклан Марий Эл правительствын грантшым – 25 тӱжем теҥгем – кучыктен. Сеҥыше ӱдыр-рвезе-влакын лӱмышт: Дамир Назмутдинов (Политехнический лицей-интернат), Валерия Аганина (Йошкар-Оласе А.С.Пушкин лӱмеш 4-ше №-ан гимназий), Виктория Маклакова (Т.В.Иштрикова лӱмеш «Канде кайык» гуманитарный гимназий), Анна Попова ден Софья Волкова (Йошкар-Оласе 28-ше №-ан лицей).

Правительствынан грантше дене тыгак нунын педагог-наставникышт палемдалтыныт. Тиде – Оксана Тулулюк, Елизавета Уразаева, Ксения Ушакова, Татьяна Янаева, Елена Милютина да Марина Поспелова.

Марий Эл вуйлатышын администрацийжын информаций паша пӧлкажын уверже негызеш Г.Кожевникова ямдылен.

Фотом Марий Эл Образований да науко министерствын сайтше гыч налме

 

 

Опубликовать в Одноклассники

Добавить комментарий