Калыкын икоян улмо кечылан да Марий Эл Республикын кечыжлан пӧлеклалтше торжественный мероприятий Эрик Сапаев лӱмеш Марий кугыжаныш академический опер да балет театрыште эртен.
Марий Эл вуйлатыше Юрий Зайцев палемден: Калыкын икоян улмо кечыже – моткоч кӱлешан кугыжаныш пайрем. Тудо Российын шӱм-чон да тӱвыра поянлыкшым ончыкта, Российын геройло эртыше пагытше, соотечественникна-влакын подвигышт нерген ушештара, еҥ-влакын кумда элнан ончыкылыкшо нерген икгай ончалтышан улмышт нерген ойла.
– Россий калыкын икоян улмыжо, шуко курымласе йӱлам аралымаш, тудын тукым гыч тукымыш куснымыжо тӱрлӧ нелылык ден лӱдыкшылан вашешташ да ваштареш шогаш полшат, – каласен республик вуйлатыше.
4 ноябрьыште Марий Эл Республикын кечыже палемдалтме нерген тудо тыге палемден:
– Ме тудын поян историйже, тӱвыраже, йӱлаже, сеҥымашыже дене кугешнена. Нуно тачат аралалтыт да вияҥыт.
Регион вуйлатыше чылаштлан тазалыкым, улан илышым, элна верч у кӱкшытыш шуаш тыланен да республикнам вияҥдымашке кугу надырым пыштыше икмыняр еҥлан кугыжаныш наградым кучыктен.
Марий Эл вуйлатышын пресс-службыжын уверже негызеш
Любовь Камалетдинова ямдылен
