Сеҥымашым лишемдыше тукым
Шочмо элым аралыме сомыл кеч-могай жапыштат пӧръеҥын эн кугу порысшылан шотлалтын. Ача-ава армий радамыште службым эртыше эргыж дене кугешнен да тачат кугешна.
Марий ялыште шочын-кушшо рвезе нигунам армий деч шылаш тӧчен огыл, тудо тыныс илышын ласкалыкшым аралымашке эре кумылын ушнен. Вет кочажат, ачажат тиде корным эртеныт, тудланат тидым сугыньленыт.
Таче ме порысым ӱшанлын шуктышо ик марий еш дене палдарена. Тиде Марий Турек кундемысе патыр-влак. Иктыж денем е поснак кугешнена. Сергей Иштуганов – Российын Геройжо.
Кугезе кочашт – Кугу Отечественный сарын участникше Николай Григорьевич Коротков. Киров область Малмыж оласе военкомат гыч сарыш каен, гвардейский стрелковый корпусышто служитлен. 1943 ий 15 декабрьыште сӧй пасуэш ӱмыржӧ кӱрылтын.
Тудын кок уныкаже (Вера ӱдыржын эргыже) Геннадий ден Владимир совет армийыште порысым шуктеныт.
Геннадий Васильевич Андреев Тблисский артиллерийский училищыште кок ий водитель сомылым шуктен. Тудын Григорий эргыже Йошкар-Оласе олимпийский резерв училище деч вара армийыште служитлен. Контракт почеш Сирийыште лийын. «За Отвагу» медаль дене палемдалтын, кызыт – СВО-што.
Владимир Васильевич Андреевын (Краснодар крайыште юж десант войскште служитлен) Ярослав эргыже Тула оласе Суворовский училищым тунем лектын. Кызыт генерал В.Маргелов лӱмеш Рязаньысе юж-десант войскан кӱшыл командный училищыштыже тунемеш.
Уныкаже Лариса Васильевна Иштуганован эргыже – Сергей Иштуганов.
2022 ий декабрьыште элнан президентше Владимир Путин Россий Герой землякнан, Сергейын, оҥышкыжо «Шӧртньӧ Шӱдыр» медальым пижыктен. Мероприятий Москошто, Кремлёвский дворецын Георгиевский залыштыже эртен. А Ларисан ачаже, Василий Андреевич Андреев, 1953-1956 ийлаште Китай границыште погранвойскаште служитлен.
Кугешнена ме марий патырна-шамыч дене. Тек виян тукым ончыкшымат шуйна, пеҥгыдемеш, вуй ӱмбалнына эреак тыныс кава лиеш, а СВО-што задачым шуктышо эргына, пелашна, ачана-влак таза да илыше пӧртылыт.
Е.Эшкинина.
