Кугу Отечественный сарыште сеҥымылан 80 ий темме вашеш эртаралтше «Сеҥымаш тулсавыш» калык усталык фестиваль 31 январьыште Сеҥымашын ХХХ идалыкше лӱмеш тӱвыра полатыште почылто.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов Марий Эл вуйлатыше Юрий Зайцевын саламлымашыжым лудын пуэн.
– Мемнан геройна-влакын, кугезына-шамычын ыштыме подвигыштлан пӧлеклалтше фестиваль – икоян улмынам да тукым ден тукым кокласе кылым ончыктышо символ. Тудо мемнам ик верыш уша да Кугу Отечественный сар жапыште эрык илыш верч илаш-колаш кредалше-влакын патырле, виян лиймыштым да кызытат ты пашам шуктышо-влакым шарныктара. Фестивальын кажне участникше усталык шӱлышан, калыкнан тӱвыраж ден йӱлажым аралыше да нуным тукым гыч тукымыш шуен толмыж дене ойыртемалтеш. Тендан мастарлыкда калыкнан ойыртемжым аралаш, патриотизм шӱлышеш кушташ да Шочмо Элым йӧраташ кӱлешан ошкыллан шотлалтеш, – возымо серышыште.
«Сеҥымаш тулсавыш» – республикнан тӱвыра илышыштыже историйым аклымын кӱлешан улмыжым да тукым гыч тукымыш куснен толшо кыл улмым ончыктышо кӱлешан событий.
Варажым Константин Анатольевич фестивальын символжым Йошкар-Ола администраций вуйлатышын пашажым жаплан шуктышо Антон Трудиновлан кучыктен.
– Кугу сеҥымашлан – 80 ий. Ме сеҥымашым лишемдыше-влакын тукымышт улына. Кугезына-влакын подвигыштым, геройло кредалмыштым ме шарнена, шарнаш тӱҥалына да тыныс илышым пӧлеклымыштлан таум ойлена, – палемден Антон Аркадьевич.
Марий Эл вуйлатышын пресс-службыжын
уверже негызеш Алевтина БАЙКОВА ямдылен
