Нижний Новгородысо Сеҥымаш паркыште Юл кундем регион-влаклан «Сеҥымаш тополь» акций кышкарыште пушеҥге озымым пуэденыт.
Марий Эл гыч озымым налаш пӱртӱс поянлык, экологий да йырым-йырысе средам аралыме шотышто министр Алексей Киселёв миен. Легендарый пушеҥгын озымжо-влакым Рослесхоз вуйлатыше Иван Советниковын пунчалже почеш кодшо идалыкысе паша лектыш дене ойыртемалтше регион-влаклан кучыктеныт.
«Сеҥымаш тополь» – тиде Волгоградысе Вуйым пыштыше салтак-влакын площадьыштышт шогышо пушеҥге. Тудо Кугу Отечественный сар годым Сталинградрыште эртыше тале кредалмаш жапыштак кушкын. 1943 ий шошым олам эрыктыме годым изи пушеҥгым верештыныт. Варажым тудо атыланен да пеледалтын, Кугу Отечественный сарыште сеҥымынам шарныктыше да илышын ончыко кайыме символышкыжо савырнен. Ынде ты топольын озымжо Йошкар-Оласе тӱвыра да каныме паркыште кушкаш тӱҥалеш. Тудым Марий Эл вуйлатыше Юрий Зайцев шкежак шынден.
«Тыгай пушеҥге элнан кажне олаштыже кушшаш. Кугу Сеҥымашым кондышо да тыгак СВО-што вуйым пыштыше сарзе-влакым, 80 ий ончычсо семынак Шочмо элнан эрыкше верч кредалше-влакым, ме эре шарнаш да нунылан таушташ тӱҥалына», – палемден Юрий Зайцев.
Сеҥымаш топольын озымжым Волгоградысе питомник гыч 12 ий эл мучко колтедат. Тыгай тополь воинский чапым налше олалаште – Орёлышто, Белгородышто, Воронежыште, Курскышто, тыгак Сеҥымашым таптыште олалаште – Самарыште, Омскышто, Уфаште да икмыняр моло вере кушкеш.
«Сеҥымаш тополь» – тиде экологий акций гына огыл, эн ончыч элнам тушман деч утарен кодышо-влак нерген шарнымашым арален кодаш полшышо тӱҥалтыш, ваш келшен, тыныслын илаш кӱлмым ушештарыше символ.
Марий Эл вуйлатышын пресс-службыжын уверже негызеш Светлана Носова ямдылен.
