Александр Евстифеев: «Юл кундем федеральный округышто Марий Элыште гына у коронавирус инфекций ваштареш виктаралтше кугу чарак-влакым пуртымо огыл. Тыгай мерым ыштыме деч мемнам вакцинацийыш тӱшкан ушнымына утарен кода».
3 ноябрьыште Марий Элым вуйлатыше Александр Евстифеев озанлыкым кучышо субъект вуйлатыше-влак ден республикыште илыше калык деке пайрем деч ончыч йодмаш дене лектын.
«Республикыште илыше калык, эн ончычак озанлыкым кучышо субъект вуйлатыше, ялозанлык ден тӱвыра пашаеҥ-влак, йочасадыш да школыш коштшо йочан ача-ава-шамыч, тендан деч тӱшка пашам ончыкыжымат вияҥден колташ, вакцинацийым тымарте эртыме шырымым шке кӱкшытыштыжӧ кучаш йодам. Мыланна республикысе эпидемиологический сӱретым саемдаш, олалаште да селалаште илыше калыкын илышыж ден тазалыкшым арален кодаш кӱлеш», – манын регионым вуйлатыше шке обращенийыштыже.
Регионысо больницылашке кече еда ковид дене черланыше 100 утла еҥым эмлалташ пыштат, тыгодым шукыштын шодышт 70 да тылеат шуко процентлан локтылалтше. Врач-влак мыняр кертыт, тунарак пашам ыштат, палемден А.Евстифеев.
«Таче коронавирус нигӧмат: ны самырыкым, ны илалшым – огеш чамане. Черланыше-влак ача-авам, йоча ден уныка-шамычым ужде кодын кертыт. Ме нормальный илышыш пӧртылшаш улына. Юл кундем федеральный округышто Марий Элыште гына у коронавирус инфекций ваштареш виктаралтше кугу чарак-влакым пуртымо огыл. Вуйлатыше-влак деч республикын правительствыж ден медик-влаклан полшышо волонтёр толкыным чаракым кугемдымашке кондымо деч аралаш йодам, молан манаш гын тиде экономикылан, кажне еҥын сай илышыжлан, кажне предприятийын экономикыжлан зияным ышта. Республикын правительствыж ден оперативный штабшылан полшаш йодам», – палемден А.Евстифеев.
Ситуаций начаремеш, вакцинацийын шырымже иземеш гын, кучемлан локдауным увертараш, школьник-влакым тора гыч тунемме радамыш кусараш, общепитым, тӱвыра ден спорт тӧнеж-влакым, быт услуго ден моло сферым петырашыже логалеш, рашемден республикым вуйлатыше.
«Элыштына ик эн йӧратыме пайрем – У ий – марте тылзе дечат шагал жап кодын. Тудым родо-тукым да лишыл еҥ-влак дене пырля вашлийын кертме ваштареш ида лий. Ковидым сеҥен кертмына мемнанак кидыште!» – палемден Марий Элым вуйлатыше Александр Евстифеев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
