Фестивальын кокымшо кечынже Оршанке ден Шернур районласе коллектив-влак мастарлыкым ончыктеныт.
Шарнымашнат, мурынат икгай…
Оршанке районын «Шарнымашнат да мурынат икгай» кундемынат да мыйынат» концерт программышкыже Шочмо элнам йӧратыме да тудын дене кугешныме кумылым лукшо муро ден куштымаш-влакым чумыреныт. Нунын гоч сар жапын кочо тамже шижалтын.
Сценыште йоча коллектив ятыр лийын. Тугеже ӱшанлын ойлаш лиеш: сарыште лийше-влакын тыныс илыш верч кредалмыштым, неле пагытыште тылыште тыршыше коча-кована-влакын надырыштым палдаренак шогат. «Ме сеҥышын тукымжо улына, садлан историйым палышаш да шарнышаш улына», – маньыч «Шонанпыл» образцовый ансамбльын участникше-влак.
Оршанке район гыч шым тӱжем утла еҥ фронтыш каен, тушечын 4292 салтак пӧртылын огыл, увер деч посна йомшылан 2395 еҥ шотлалтеш. Совет Ушем герой лӱм дене Александр Владимиров ден и Николай Рябинин палемдалтыныт, а Василий Васенёв ден Николай Шевнин Чап орденын чыла степеньжым налыныт.
«Тусо пагытлан вуйнам савена»
Тыге лӱмден шке программыжым Шернур районын усталык ешыже.
Шернур кундемын 9151 шочшыжо фронтыш каен, тушечын ныл тӱжем утлаже веле пӧртылын. Кызыт районышто сарын 11 участникшын пелашыже, тылын 40 труженникше, сар жапысе 497йоча илат. Артист-влак 1941-1945 ийласе илышым муро, куштымаш да почеламут гоч почын ончыктеныт. Пӧръеҥ-шамычым сарыш ужатыме, ялыш кодшо ӱдырамаш-влакын чодырам руымаште тыршымышт нерген сценке («Пӧлек» фольклор ансамбль) шинчавӱдым луктын, ойган мурыштым колыштын, логарыш кочо комыля кӱзен.
Икмыняр факт ӧрыктарыш: сар жапыште Шернур посёлкысо педучилищын тошто оралтыштыже йочапӧртым почыныт. Тушто республикысе тӱрлӧ район гыч 200 утла икшыве илен, варажым эше Ленинград, Псков областьла, Моско, эсогыл Польша гыч 360 йочам конденыт. Изи икшыве-влаклан мландым кӱнчен, пакчасаскам ончен кушташат, кӱварым, вургемым мушкашат логалын. Тидым «Ласточка» образцовый ансамбль сценыште пеш мастарын ончыктен.
Шернур район гыч Будёнов лӱмеш да «Икымше май» колхоз-влак сарыш 18 имньым колтеныт. Ик бойышто салтакын фронтыш ужатен колтымо шке имньыжым вашлиймыже да тыге колымаш деч утаралтмыж нерген Денис Мамаевын монологшо шукыштым шортарен.
Марий салтакна-влак кызытат элнам аралат. Спецоперацийын пытымыжым да тушечын геройна-влакын пӧртылмыштым ме чыланат чот вучена. Лариса Еменгулован йоҥгалтарыме «Тый сӧренат пӧртылаш» мурыжо кажне вучышын чонышкыжо ӱшан тулым пуртымо гаяк лийын.
– Мемнан коча-кована-влак 80 ий ончыч тушманым сеҥеныт. Тидын нерген чылан палена, тидым шарнена да ветеран-влаклан кугу таум ойлена. Меат, кызытсе боец-влак, элнам ӱшанлын аралена. Сеҥымаш садак мемнан лиеш! – манын каласышт концерт деч вара спецоперацийын участникше-влак.
Алевтина БАЙКОВА
Михаил Скобелевын фотожо
