Кугу Отечественный сарыште сеҥымашлан 80 ий теммым шушаш ийыште палемдаш тӱҥалына, а Сеҥымаш парк тиде кечылан кызытак ямдылалтеш.
Подрядный организаций паркыш пурымаште улшо стендын кӱртньӧ ужашыже-влакым шлифоватлен уэмда, герой-влак лӱмеш аллейысе стела-шамычым чиялта. В.И.Ленин лӱмеш тӱвыра полатын пашаеҥже-влак, субботникыш лектын, газон ден тротуарлам лышташ деч эрыктат, шотыш пуртат.
Ушештарена, «Оласе средам йӧнаным ыштымаш» федеральный программе почеш, 2019 ийыште Сеҥымаш паркыште бордюрым шогалтылме, тылын труженникше-влаклан памятник ончылан да моло площадкыште асфальтым шарыме, тротуарлашке брусчаткым пыштыме, понарым сакалтыме. Тыге парк калыкын каналтыме да тыгодымак историйым шарныктыше верышкыже савырнен.
Лидия СЕМЕНОВА
Фотом Йошкар-Ола администрацийын сайтше гыч налме
