5-17 декабрьыште Сочи олаште патриотизм шӱлышан «Наука побеждать» образовательный проектын кышкарыштыже самырык шымлызе-шамычын вуз-влак кокласе «Образований. Науко. Профессий» Россий кӱкшытан XX конференций да элнан общеобразовательный организацийлаштыже кадет ден мариинский класс-влакын командыштын XV телымсе сборышт эртеныт. Марий Элын чапшым тушто кок команде арален. Тиде – Медведевысе 3-шо №-ан школын «Беркутшо» ден «Орлята». 53 кадет, школ директор Лариса Чугунован вуйлатымыже почеш, Гран-прим сеҥен налын!
Эн ончычак тунемше-влак «Шочмо кундем, курымешлан йӧратыме» темылан визитный картычке конкурсышто пашаштым ончыктеныт да I степенян диплом дене палемдалтыныт. Тиде кечылаштак тушто эртыше общеобразовательный предметла дене олимпиадылаште мемнан ӱдыр-рвезе-шамыч ныл направлений дене сеҥышыш да призёр радамыш лектыныт.
Кок командыжат спорт таҥасымашлаште сеҥеныт да икымше вер дене палемдалтыныт.
«Пеленет улына, Россий!» патриотизм муро конкурсышто мемнан кадет сольный мурымаште I степенян дипломым сеҥен налын, а «Орлята» команде «Актуальность» номинацийыште эн ончылно лийын.
16 декабрьыште Изи Нобелевский академийын сборжым торжественно мучашлыме годым «Созвездие» номинацийыште сеҥыше-влакым саламленыт. Каласыман, тушто чыла интеллектуал, спорт да усталык конкурслаште эн виян-шамычым гына палемденыт. Тыгай-влак радамыште кадет-влак Ксения Воробьёва, Никита Суханов, Никита Новиков да Сергей Ткаченко улыт.
Тыге общекомандный зачётышто «Беркут» команде Гран-прим сеҥен налын да эн кугу награде – корабльын модельже – дене палемдлтын! А «Орлята» команде общекомандный зачётышто II верыш лектын да тудлан кубокым кучыктеныт.
Г.Кожевникова
Фотом Марий Эл Образований да науко министерстве гыч налме
