Марий кугыжаныш университетыште Кугу Отечественный сарын участникше-влак лӱмеш шарнымаш оҥам почыныт.
1942-1943-шо ийлаште гына Н.К.Крупская лӱмеш Марий кугыжаныш педагогический институт гыч 20 наре студент шке кумылын фронтыш каен.
Вузын коллективше сар жапыште фронтлан кугу полышым пуэн. 1941 ий ноябрь-декабрьыште студент ден преподаватель-влак Волжский оборонительный рубежым чоҥымаште, тыгак Курыкмарий кундемыште военно-полевой пашам ыштыше бригадыштыже тыршеныт.
Институтышто танк колоннылан оксам погымылан коллективлан Верховный Главнокомандующий деч тауштымашан телеграммым колтеныт.
Студент-влак кажне кеҥежым да шыжым колхоз-влаклан полшаш коштыныт. Тидын деч посна нуно тунемме вер ден тӱшкагудыштланат пуым шкак ямдыленыт. Преподаватель-влак тыгодым мер пашам шуктеныт: нуно калыкыш лектыныт да вашлиймашым, сылнымут концертым эртареныт.
Г.Кожевникова
Фотом Марий кугыжаныш университетын сайтше гыч налме
