Марий Элысе ветеран-влакын мер организацийышт тачысе кечылан 366 первичный организацийым уша.
Шукерте огыл Сарын, пашан, Вооруженный Вийын да правам аралыше орган-влакын ветераныштын всероссийский мер организацийыштын Марий республиканский организацийжын бюрожын да оласе совет-влакын президиум вуйлатышыштын кумдаҥдыме заседанийышт эртен. Тушто мер илышыште лектын шогышо, организацийын пашажым саемден колтымо дене кылдалтше йодыш-влакым каҥашеныт. Ветеран ушемым вуйлатыше Михаил Крыловын (снимкыште пурла гыч кокымшо) палемдымыж почеш, Российысе ветеран ушемын рӱдӧ каҥашыж гычак тыгай кӱштымаш толын: первичный организаций-влакын пашаштым вияҥден колташ. Ты темлымашым мемнан ветеран-влакат шотыш налыныт. Ушемын еҥже-влак вес ийын 9 майыште Кугу Сеҥымашлан 80 ий теммылан ямдылалташ тенияк тӱҥалыныт. А тудын вашеш Россий мучко первичный ветеран ушем-влак коклаште икымше гана смотр эрташ тӱҥалеш.
Кугу Сеҥымаш кече вашеш организацийым вуйлатыше-влак ийготыш шушо сарын ветеранже-влак деке лӱмын нуным саламлаш пӧлек дене унала коштыт. Мутлан, шукерте огыл Йошкар-Олаште илыше 99 ияш Федор Николаевич Веселов (снимкыште пурла гыч икымше) деке йыҥгыртеныт. Ветеран «Мый декем кошташ огеш кӱл, шке миен лектам» манын вашештен. «Чынжымак, Фёдор Николаевич – эше пеш чолга марий, вуй ушыжат чоткыдо, мыскарамат ышта. Пырля служитлыме йолташыже-шамычымат шарна. Тудо Оршанке кундемыште шочын-кушкын. 1943 ийыште 17 ияш сарыш каен, противовоздушный обороно войскаште служитлен, Кавказыш колтеныт улмаш. «За оборону Кавказа», «За победу над Германией в Великой Отечественной войне 1941-1945 гг.» медаль-влак дене палемдалтын. Елизавета пелашыж дене кум шочшым ончен куштеныт. Сар деч вара сельсовет, колхоз председателят лийын, кӱшыл образованийым налын, высший партийный школым тунем лектын, Марий машиностроитель заводышто ыштен. Таче ветеран СВО-што мо ышталтмым тӱткын эскера да мемнан салтак-влакын сеҥымашыштлан, элнан сай ончыкылыкшылан ӱшана.
Кодшо курымышто лийше эн шучко сарын кажне участникше тыгай ӱшан дене ила, очыни. Михаил Михайловичын палемдымыж почеш, тыгай еҥ-влак ынде кугу ийготан улыт. Мутлан, Николай Павлович Стрельниковлан вашке 99 ий, Николай Алексеевич Буденковлан 103 ий темеш… Михаил Михайлович – шкежат военный пенсионер. Ынде куд ий наре ты организацийыште ышта. «Чаманен каласыман, – манеш тудо – кажне ийын сарын участникше-влак шагалрак да шагалрак кодыт. Сӱрет кажне кечын гаяк вашталтеш манаш лиеш.
Мутлан, апрельлан социальный фондын пуымо данныйже почеш, таче республикыште сарын 32 участникше, 9 еҥ блокадный Ленинградын участникше, концлагерьын 25 узникше, 1954 еҥ тылын турженикше да 20 тӱжем наре сар годым шочшо йоча-влак улыт.
С.Носова
Снимкыште: Ф.Н.Веселовын ветеран ушемыш толмыж годым.
Фотом ушемын архивше ыч налме.
