Марий калык конгрессын еҥже да журналист семын Санкт-Петербургыш миен толаш йӧн лекмылан нимучашдымын куаненам. Ты организацийым да тыгак «Марий Эл» савыктыш пӧрт» учрежденийым вуйлатыше Эдуард Иманаевлан пырля налмыжлан тауштыде ом керт. Эртыше кечылаште Марий калык конгресс Санкт-Петербургышто Марий Элын кечылажым эртарен манаш лиеш. Тушто илыше марий-влак пырля погыненыт, марий сем йоҥген, мемнан лӱмлӧ сӱретче-влак шке пашаштым ончыктеныт.
Ик кече тушко кайыме, эше ик кече толмо корнат оҥай ыле. Моткоч ойыртемалтше еҥ-влак пырля лийыныт: Российын сулло сӱретчыже-влак Иван Ямбердов ден Сергей Алдушкин, Марий Элын сулло артисткыже-влак Алина Егошина ден Марина Почтенева, У Торьял район муниципал образованийын депутатше-влак погынымашым вуйлатыше Евгений Небогатиков, Марий Турек гыч апшат Николай Тимофеев. А самырык музыкант-влак нерген поснак ойлыман. Ончыкылан моткоч кугу ӱшаным пуат веле огыл, гармонь дене туге мастарын шоктат. Кок кече мемнам автобус дене наҥгайыше водитель Виктор Белоусовлан мален колташ пуаш огыл манын, иктыже весым алмаштен, семӱзгарышт дене шоктен муреныт, тиде – И.Палантай лӱмеш Тӱвыра да сымыктыш колледжын тунемшыже-влак Александр Коновалов, Алмаз Хаметов да Николай Степанов.
Санкт-Петербургышто вашлиймаш Марий Элын Тӱвыра, савыктыш да калык-влакын пашашт шотышто министерствыжын, Санкт-Петербургышто да Ленинград областьыште Марий Элын представительствыжын, Эл кӧргысӧ кыл, тыгак Калык-влак кокласе кыл да миграционный политикым илышыш шыҥдарыме шотышто Санкт-Петербургысо комитет-влакын полшымышт дене эртен. Кугу таум тыгак Ленинград областьысе марий-влакын «Ший корно» калыкле-тӱвыра автономийыштлан да тудын вуйлатышыже Евдокия Соловьевалан каласыман. Вашлийыныт моткоч шокшын Келшымаш пӧртыштӧ. А пӧртшӧ могай! Тушто нуно эсогыл марий тоштерым ыштеныт. Марий Эл гыч мийыше-влакым вашлияш Келшымаш пӧртын моло калык гыч лекше озаже-шамычат толыныт ыле. Каласен кодыман, ты автономий грант пашам моткоч сайын ворандара, санденак марий-влакым тушто чынжымак пагалат.
Санкт-Петербургышто марий-влакын представительствыжым Елена Таникова вуйлата. Тудлан поснак кугу таум ойлыман. Келшымаш пӧртыштӧ, Калык ратушышто вашлиймаш, Российысе национальный книгагудышто марий сӱретче-влакын ончерышт, туштак марий концерт, чыла тидым эртарыме дене кылдалтше йодыш-влакым шуктымылан лач тудо вуйын шоген. Эше Калык ратушышто вашлиймаш годым Марий Эл дене вашкыл эртен. Видео йӧн дене Марий Эл правительстве председательын икымше алмаштышыже Михаил Васютин, тӱвыра, савыктыш да калык-влакын пашашт шотышто министрын алмаштышыже Игорь Садовин да Калык усталык рӱдер вуйлатыше Эльвира Куклина погынышо-влакым саламленыт.
Иван Ямбердов ден Сергей Алдушкинын ончерыштым тыгак кызыт Санкт-Петербургышто илыше Марий Элыштак шочын-кушшо кок сӱретче Андрей Дубников ден Олег Богданов шке пашашт дене пойдареныт. Ты ончер эше кок арня пашам ышташ тӱҥалеш. Санкт-Петербургышто илыше вашлиймашке марий-влак толмышт дене поснак куандарышт. А нунын куанышт мыняр ыле ¬- тидым ужаш кӱлын. Иван Михайловичлан гын Татьяна ӱдыржӧ Великие Луки ола гыч лӱмын полшаш толын. Скрипке дене шоктен ончер почмашым сӧрастарыш. Мемнан артист-влакын концертыштат ушеш кодеш. Марий сем почеш кушташ лекше-влакын кумылыштым умылашат лиеш. Мӧҥгыш каяш иктат вашкен огыл.
Светлана Носова
Снимкыште: Российысе национальный книгагудышто вашлиймаш годым.
Марий калык конгрессын архивше гыч налме фото.
