Юрий Зайцев «Ялын лидерже-влак – 2025» самырык управленец-влакын Всероссийский конкурсыштын финалистше дене вашлийын.
Финалист радамыш Килемар муниципал округын муниципал пого да мланде ресурс управлений отделын вуйлатышыже Елена Абдуллаева лектын. Конкурс Российысе чыла регион гыч 15 тӱжем утла участникым поген. Марий Эл гыч 18 еҥ коклаште Елена финалыш лектын. Финал элнан тӱҥ площадкылаштыже, тидын шотыштак Кугыжаныш Думышто, «Россельхозбанкын» корпоративный университетыштыже, «Единый Россий» партийын ЦИК-ыштыже эртен. Регион вуйлатыше конкурсышто участвоватлымым профессионально вияҥаш сай трамплин манын палемден.
«Кызыт регионым вияҥдымаште ик тӱҥ корнылан ял шотлалтеш. Региональный валовый продукт кышкарыште ялозанлыкын кугытшо 16 процент наре айла. Ме еҥ-влак ялеш кодышт, самырык-шамыч кундемым вияҥдымашке чолган ушнышт манын тыршена. «Ялын лидерже-влак» программе самырык вуйлатыше-шамычлан моткоч кӱлешан», –палемден Юрий Зайцев.
Мутланыме годым Елена Абдуллаева «Ялын лидерже-влак» конкурс шке вийым тергаш да опытым погаш сай йӧн лийын манын ойлен. Тудо конкурсышто кундемым инвестицийлан утларак келыштарыме, мланде участке-влакым оформитлаш кумылаҥдыме шотышто пашаче кылым ыштен.
«Мыланем тиде конкурслан ончылгоч ямдылалтмем чот полшен. Тудым кызытат пашаштем кучылтам. Республикын Ялозанлык да кочкыш сату министерствыжын эртарыме «Самырык фермерын школжо» дене пеҥгыде кылым кучена», – каласен Елена Абдуллаева. Юрий Зайцев тудлан проект-влакым илышыш шыҥдарымаште сай кӱкшытыш шуаш тыланен.
Килемар муниципал округыш пашаче визит дене мийышыжла, регион вуйлатыше Святой Пророк Илян храмыштыже лийын. Мучашлан округын социально-экономически вияҥмыже шотышто совещанийым эртарен. Школым чоҥымо, газификаций да корным ачалыме йодышлам каҥашыме.
Марий Эл вуйлатышын пресс-службыжын уверже негызеш Вячеслав Смоленцев ямдылен.
Денис Речкинын фотожо.
