Жап шижде эрта, марий композитор, Россий композитор ушемын Марий Элысе пӧлкажын председательже В.Кульшетовын уке лиймыжлан 40 кечат эртыш. Илыш вашталтеш, меат жап йогын дене эркын эртена.
11 ноябрьыште ты ушемын погынымашыже эртен. Тушто организацийын у председательжым сайлыме йодыш ик эн тӱҥлан шотлалтын. Ты пашам самырык да волгыдо ӱшан дене ончыко ончышо композитор, Э.Сапаев лӱмеш опер да балет академический театрын тӱҥ дирижёржо Григорий Архиповлан ӱшаненыт.
Григорий Вячеславович Российысе да Марий Элысе семмастар-влакын радамышкышт 2010 ийыште ушнен. Пашам ыштыме жапыште тудо камерно-инструментальный, вокальный да симфонический музыкын тӱрлӧ жанрже дене произведений-влакым, ятыр спектакльлан музыкым возен, Юл да Урал кундемласе композитор-влакын музык фестивальышт ден конкурслаштышт шоктен. Тудо ончыкшымат усталык шулышан у проект-влакым илышыш шыҥдараш да марий профессионал музыкын классикше-влакын йӱлаштым аралаш да шуяш тӱҥалеш манын, пӧлкан еҥже ден музык сообществе ӱшанат.
Погынымаште Россий композитор-влак ушемын ответственный секретарьже П.Левадный, тӱвыра, савыктыш да калык-влакын пашашт шотышто министрын алмаштышыже Е.Бурнашева лийыныт. Тушто ушемын пашажым иктешлымым да 2016-2022 ийлаште шийвундым кушко кучылтмо нерген колыштыныт. Вашлиялтше нелылык, тӱрлӧ йодыш шотышто да нуным кораҥдаш йӧным кычалме, тыгак ончыкыжымат республикысе тӱвыра организаций-влак дене кылым кучымо нерген каҥашеныт.
Погынымашын унаже-влак варажым Национальный искусство гимназийыште И.С.Палантай лӱмеш тӱвыра да сымыктыш колледж вуйлатыше А.Паскичев дене вашлийыныт. Ончыкыжым пырля пашам ышташ да тӱрлӧ мероприятийым иквереш эртараш палемденыт. Креатив индустрий школышто лиймыштат нунылан у шӱлышым пуртен, у пашалан кумылаҥден.
Тиддеч вара чыланат тений сентябрь тӱҥалтыште А.Эшпайлан почмо бюст воктеке да композитор В.Кульшетовын шӱгарышкыже пеледыш аршашым пыштеныт.
Культур программат пайдале да тӱрлӧ вашлиймашлан поян лийын.
Моско уналан «Сандал» кафеште марий кочкышым, мелнам тамлаш поснак келшен.
«Йошкар-Ола-Москва» поезд корныеҥжым вучен да элнан рӱдолашкыже наҥгаен. Кечыгут йӱр йӱрын, игечыжат мемнан дене пырля пытартыш вич ий жапыште курымешлан чеверласыше вич композиторым шарнен шортеш. Тиде – В.Данилов (2018), Ю.Бурдаков (2019), А.Луппов, Д.Сундырев, В.Кульшетов (2022).
Тиде кечын куан увержат лийын: композитор да музыковед ушемыш пураш кум кандидат деч йодмаш пурэн. Тугеже марий пӧлкаш у вий ешаралтеш.
Палемдыман, кызыт ушемыште – куд композитор (В.Алексеев, Г.Архипов, Э.Архипова, В.Захаров, А.Незнакин, А.Тихомиров) да вич музыковед (Р.Артищева, О.Герасимов, В.КУзнецова, М.Мамаева, Ю.Цыкина).
Фотом ушемын архивше гыч налме
В.Кузнецова,
музыковед.
А.Байкова марлаҥден.
