Марий Элым вуйлатышын пашажым жаплан шуктышо Юрий Зайцев вуз ден профорганизацийын выпускникше-влаклан паша верым муаш полышым пуымо шотышто программым сайлан шотлен.
Стратегий сессийыште Шернур районысо Чылдемыр ял шотан илем администраций вуйлатыше Алина Милютина квалификациян пашаеҥ-влак шотышто йодышым нӧлталын: таче нуно огыт сите, шуко выпускникше вес регионлаш пашам ышташ каят.
«Марий Элыште профессионал образованийым пуышо организацийлам тунем пытарыше-влаклан паша верым муаш полшышо программым ышташ темлем. Тӱрлӧ формым кучылташ лиеш. Мутлан, целевой контрактым: тудын келшышын выпускник тунем пытарымыж деч вара вигак паша пурен кертеш – тудланат сай, предприятийынат специалистше лиеш. Тыгодымак нунылан подъёмныйым тӱлаш, самырык ешлан илыме верыштлан льготым ышташ темлем. Тӱҥжӧ – самырык-шамычлан сай паша верым пуаш, а предприятийлан – виян пашаеҥым», – каласен тудо.
«Марий Элым вуйлатышын пашажым жаплан шуктышо тиде темлымашым сайлан шотлен. «Тунем пытарыше самырык еҥым шочмо кундемыштак пашам ышташ кодаш йӧным ыштыман. Вес семын огеш лий», – палемден тудо.
Пашаеҥ-влакым ямдылыме шотышто Юл кундем кугыжаныш технологий университетын ректоржо Игорь Петухов тыге каласен: «Экономике областьыште стратегический сессийыште палемденна: чыла отрасльыштат квалификациян самырык еҥ-влак огыт сите. Тидлан кӧра вузлаштына профилян кафедр ден лабораторийлам ышташ шонымаш шочын».
Юрий Зайцев палемден: тунемын пытарыме деч вара вигак пашам ыштен кертше самырык еҥ-влакым ямдылыме шотышто йодышлан посна тӱткышым ойырыман.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
Д.Речкинын фотожо
