«МАРИЙ ЭЛ» ТАЧЕ

Сайлымаш вашеш: Ойпидыш ышталтын, туныкташ тӱҥалыныт

Республикысе профсоюз-влакын залыштышт шушаш Россий Президентым сайлымаште Марий Элысе Мер палатын эскерыме пашам эртарымашке мер организаций-влакым ушымо дене кылдалтше ойпидыш-влак ышталтыныт.
Ушештарен кодыман, кодшо ий декабрь кыдалне Россий Президентым сайлымаш годым мемнан республикыште Эскерыше мер штаб ышталтын ыле. Тудым «Марий Эл» увер агентствын директоржо Евгений Кузнецов вуйлата.
Ойпидыш-влакыш кидпалым пыштымашке 10 мер ушемын еҥже-влак толыныт. Нунын коклаште Российысе юрист-влакын ассоциацийыштын республикысе пӧлкаже, Марий Элысе волонтёр медик-влакын организацийышт, Марий калык конгресс, республикысе Ветеран-влак ушем, Российысе исторический обществын регионысо пӧлкаже, «Царьград» обшество да молат. Мутлан, Российысе калык-влакын ассамблейыштын Марий Элысе организацийжым Лариса Яковлева вуйлата. Тений тудын представительже-влак икымше гана ты пашаш ушнат. Российысе журналист ушемын Марий Элысе пӧлкажым кодшо ий гыч Александр Абдулов вуйлата, тудын денат ойпидыш ышталтын. А теве Марий калык конгрессын вуйлатышыже Эдуард Иманаев кумшо гана ойпидышыш кидпалыжым пыштен.
Мер палатым вуйлатыше Герман Дементьевын палемдымыж почеш, тачысе кечылан респубик мучко эскерыме пашаш 1000 наре еҥым ушымо, кызыт нуно тунеммашым эртат. Нуно лачшымак нине организаций-влакын еҥышт улыт. Тыгай мер организаций-влак деч колтымо наблюдатель-влак сайлымаш годым кугыжанышын закон дене пеҥгыдемдалтше радамым шуктымым эскераш тӱҥалыт.
С.Носова
Снимкыште:ойпидыш-влакыш кидпалым пыштыме годым.
М.Скобелевын фотожо

Опубликовать в Одноклассники

Добавить комментарий