Республикын правительствыштыже граждан-влакын паша праваштым шуктымо да шолып пашавер ваштареш кучедалме йодышлам лончыленыт.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов шолып пашавер ваштареш кучедалме да неформальный пашаверым шагалемдыме, пашадарым тӱлымӧ радамым пеҥгыдемдыме, кугыжаныш бюджет огыл фондыш страховой взносым тӱлымӧ йодышла шотышто ведомство-влак кокласе комиссийын заседанийжым эртарен.
Совещанийыште Марий Элыште айдемын праваж шотышто уполномоченный Фанис Мухаметгалиев, тӱҥ федерал инспектор Сергей Беляков, прокуратурын, федерал да регионысо ведомство, профсоюз-влакын еҥышт, меръеҥ ден пашам пуышо-шамыч лийыныт.
Заседанийыште регионысо южо предприятийыште пашадар шотышто парымым шӧрымӧ, пашам пуышо-шамычын эн изи пашадарын кугытшым шотыш налме, неформальный огыл пашаверым шагалемдыме, республикысе ведомство-влак кокласе комиссийын пашаче группыжо-шамычын муниципал образованийлаште пашам ыштымышт нерген мутланеныт. Тыгак контроль-надзор ведомство, верласе администраций да парыман организаций-влакын пашаеҥышт отчётым ыштеныт.
Совещанийыште кучем орган ден виктем-влаклан калыкын тичмаш пашадарым жапыштыже налаш праважым шуктымо шотышто ситуацийым, тыгак шолып пашавер ваштареш кучедалме сферыште ведомство-влак коклаште шуктымо пашам саемдаш пунчалыныт.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
