20 августышто Национальный художественный галерейыште Почмо омса кече эрта.
Кечывал деч вара йоча да ача-ава-влаклан интерактивный экспресс-экскурсий лиеш, нуно «Акварель времени» выставкым ончен савырнат. Ты проект Нижний Новгород гыч акварель дене пашам ыштыше художник-влак Николай ден Владимир Величкомытын пашашт дене палдара.
Тиддеч вара галерейыш мийыше-влакым усталык студийын презентацийже да Республикысе сӱретсымыктыш тоштер ден Национальный художественный галерейын оҥай программышт вуча. Тыгодым тӱрлӧ ийготан йоча-влак веле огыл, кугурак-шамычат яра жапыштым пайдалын эртарен, уш-акылыштым пойдарен кертыт. 10-15 ияш икшыве-влакым Марий Элын сулло журналистше Валерий Кузьминын вуйлатыме фотостудийже фотоискусствылан утларак шӱмаҥда. Занятийыште ӱдыр-рвезе-влак фотоаппаратым чын кучылташ, художественный фотографий, композиций шотышто кумданрак пален налын, фотографийым компьютерыште обработатлаш тунемын кертыт.
Кас велеш йоча-шамычлан значокыш, фигуркыш сӱретлаш туныктымо мастер-классат оҥай лийшаш.
Икманаш, ты кечын сӱретсымыктыш деке чакрак лияш веле огыл, тӱрлӧ усталык студийын пашаеҥышт денат вашлийын мутланаш йӧн пуалтеш.
А.БАЙКОВА
