Сӱретлаште – калык эпос
Республикысе изосымыктыш тоштерыште якут сӱретче Мира Аргунован ончерже почылтын. Тудым «Диалог культур» проект полшымо дене илышыш шыҥдарыме. Выставке Калык-влакын икоян улмо кечыштлан пӧлеклалтын. Ончерым иканаште кум вер: Йошкар-Олаште, Сочиште «Сириус» туныктымо рӱдерыште, Якутийыште Верхоянье районышто ужаш — йӧн уло.
Мира — Саха Республик гыч, Россий сӱретче-влак ушемын еҥже, график да иллюстратор. Тудо, эксперт-влакын аклымышт почеш, Россий креативный индустрийын шӱдӧ лидерже коклашке пура.
Мира Аргунова Саха кугыжаныш педагогический академийыште йот йылме пӧлкаште тунемын. 2021 ийыште Арктический тӱвыра да сымыктыш кугыжаныш институтышто станковый живопись пӧлкам тунемын пытарен. Мира Павловна пашам ыштымыж годым якут калыкын фольклоржылан эҥерта. Тудын сӱретлаштыже саха калыкын йомакше, мифше гыч герой-влакым ужаш лиеш. Радыналаштыже волгыдо тӱсым кучылтеш. Ты тӱс калыкын чонжым утларак почын пуа манын палемда.
Кажне пашаже шкешотан. Ик вере ме шулдыран суксым, вес вере шемгоракым ушештарыше ӱдырым ужына. Тудын ӱпшӧ тегыт гай шем тӱсан. «Чолбон» радынаште ӱдыр варган дене шокта. А кумшо пашаште йоча-влак имне дене родо-тукымышт деке мардеж семын писын кудалыт. «Тылзе ӱдыр» радынаште ӱдыр вӱдвара дене вӱдым наҥгая.
Поснак «Аан Алахчын Хотун» паша воктеныже чарналташ да тудым кужу жап ончен шогаш тарата. Тиде Мланде аван чонжо. Тудо Кокла тӱням, родо-тукымым да нунын илемыштым арален шога. Аан Алахчын Хотун Аар Кудук Мас кугу пушеҥге рӱдыштӧ ила, калыкын ойжым Юмылан шукташ полша, улан илаш йӧным ышта, талешке ден корныш лекше еҥлан вийым пуа, арала, шке шӧржым йӱкта. Тыгак ӱдырамашым да пӱртӱсым арала.
Сӱретче чылаже 33 выставкым тӱрлӧ олаште эртарен. Тудын творчествыжым уло элна пала. Мира Аргунован шке сайтше уло, сандене тушко пурен, тудын радынаже-влакым ончалаш лиеш.
Михаил СКОБЕЛЕВ,
Лидия ШАБДАРОВА
М.Скобелевын да Мира Аргунован сайтше гыч налме фото
