16 январьыште Российын сулло сӱретчыже Сергей Алдушкин республикысе Сӱрет сымыктыш тоштерыште мастер-классым эртарыш.
Курыкмарий кундемын шочшыжо, чия мастарын илышыже, усталык корныжо нерген пален налаш да акварель дене сӱретлыме мастарлыклан тунемаш кумылан-шамыч радамыште художник, архитектор, Национальный сымыктыш гимназийын тунемшыже да йолташыже-влак лийыныт.
С.Алдушкин эн ончычак натюрморт жанр нерген каласкалыш да хризантеме ден альстромерийым чумырымо аршашым сӱретлыш. Тудын пашам ыштымыжым ончаш да тыгодымак ӱстембалнысе вазыште улшо пеледыш-влакын радынаш «вочмыштым» эскераш моткоч оҥай.
– Сӱретлымым жапыште чарнен моштыман, уке гын южгунам тудым амырташат лиеш. Садлан южгунамже, ик татлан ӧрдыжкырак кораҥын, сӱретым ончыман, – манеш художник.
Пел шагат утларак жапыште паша ямде лие. Тидлан Сергей Сергеевич шкежат ӧрын колтыш да варажым гимназийыште тунемше ик ӱдырын портретшым сӱретлаш тӱҥале. Кистычкыжым я вӱдыш, я тӱрлӧ тӱсан чияш тушкалтымыжым ты ганат чотак эскерышна.
– Настенька, ноен отыл? Вашке мучашлем, – ваштарешыже шып шинчыше ӱдырым лыпландарыме семын коклан-коклан пелешта сӱретче.
Латвич минут гыч ӱдыр художникын пашажым ужо. Кумылжо нӧлталте, шыргыжалынат колтыш да мастар еҥлан тауштыш.
Тоштерыште тыгай вашлиймашым жапын-жапын эртарашак тыршат. Тидыже сӱретче-влакланат да кушкын толшо тукымланат моткоч кӱлешан.
– Гимназийын художественный классыштыже нылымше ий тунемам. Художник Сергей Сергеевич Алдушкин нерген шукерте огыл пален налынам ыле, а таче шкенжым ужаш да сӱретлымыжым ончаш пеш оҥай. Мый гуаш але ӱян чия дене утларакше сӱретлаш кумылан улам. Но тиде вашлиймаш акварель дене тӱрлӧ семын сӱретлаш лийме нерген умылтарыш. Вашке меат пленэрыш лектына, тидым тергенак ончынем, – каласыш Анастасия Попцова.
– Тыгай мастер-классыште икымше гана улам, чылажат пеш пайдале, ӧрыктарыше. Вашлиймаш шке пашашке вашталтышым пурташ полша. Яра жапыште мыят сӱретлем, садлан художникын кӱчык жапыште мотор картиным шочыктымыжым ужаш моткоч куанле. Мастар еҥ деч мастарлыклан тунемаш – шерге пӧлек, – палемдыш Йошкар-Ола гыч архитектор Андрей Иванов.
Алевтина БАЙКОВА
Авторын фотожо
