Регион вуйлатыше Юрий Зайцев республикысе Элгӧргӧ паша министерствын коллегийжын кумдаҥдыме заседанийжын пашашкыже ушнен.
– Тендан тыршен пашам ыштымыда дене шолыштмаш, вес еҥын тазалыкшылан эҥгекым шоненак ыштымаш, йӱшывуя шуктымо преступлений-влакын чотыштым иземден кертме. Подростко-влакын ыштыме преступленийыштат шагалемын, – палемден Юрий Зайцев.
Тудо ешарен: МВД пашаеҥ-влакын тыршымышт дене республикыш наркотикым кондымо икмыняр «корным» петырыме, 295 тӱшка мероприятийым эртарыме жапыште лӱдыкшыдымылыкым да мер порядкым эскерыме. Тыгодым корнылаште лийше аварий, увер технологийым кучылтын ыштыме преступлений-влак дене сӱрет эше тургыжландарышак лийын кодеш. Нине йодышлан республик вуйлатыше поснак кугу тӱткышым ойыраш кӱштен.
Коллегий жапыште Юрий Зайцев правам аралыше органлаште тыршыше-влаклан тауштен да ойыртемалтше пашаеҥ-влаклан наградым кучыктен.
Марий Элысе МВД министр Андрей Вырвич ведомствын 2024 ийыште шуктымо пашаж нерген каласкален.
Коллегийын пашашкыже тыгак Марий Эл Кугыжаныш Погын председатель Михаил Васютин, Марий Элысе Тӱҥ федеральный инспектор Сергей Беляков, исполнительный кучемын федеральный органже-влакын территориальный структурыштын вуйлатышышт ушненыт.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
