КУЧЕМЫШТЕ

«Сӧренат – ыште. Вес рецептым мый ом пале»

Тыге гына калык ӱшанаш тӱҥалеш, палемден Марий Элым вуйлатышын пашажым жаплан шуктышо Юрий Зайцев республикысе да районласе тӱшка увер йӧн-влакым вуйлатыше-шамыч дене вашлиймаште.

Ю.Зайцев тӱҥ редактор-влак дене мутланымыж годым коллектив-шамычлан кӱлешан пашам сайын шуктымыштлан тауштен.

«Тендан дене шукертак вашлийнем ыле. Тыште республикысе газет, телевидений да радио редакцийлам вуйлатыше-влак улыт. Масс-медиан чыла элитыже. Мыйын умылымаштем, тӱшка увер йӧн – тиде пеш кугу вий. Арам огыл тендам нылымше кучем маныт: СМИ южгунамже калыкын пӱрымашыжым веле огыл решатла, элынымат. Мыланем печатный ден электрон СМИ, радио ден телевидений, социальный кыл-влак ик семын кӱлешан улыт. Мыланем социальный кыл ден телеграм-канал-шамыч шке нерген каласкалыме, шонымашым почын пуымо, калык дене диалогым ыштыме инстумент улыт. Мый комментарий-влакым эре лудам», – палемден регионым вуйлатышын пашажым жаплан шуктышо.

СМИ-н еҥже-шамыч вашлиймаште шуко темым нӧлталыныт да Ю.Зайцевлан йодыш-влакым пуэденыт. Нунын кокла гыч иктыже республикыште у айдемылан верысе калыкын ӱшанжым могай йӧн дене сулен налаш лийме дене кылдалдтын.

«Ик принцип гына: сӧренат – ыште. Ыштен от керт – лучо ит сӧрӧ. Вес семын нигузе. Ӱшаным пашан лектышыж дене гына сулен налаш лиеш. Мутланыме дене огыл, а результат дене. Тыге гына: сӧренат – ыштенат. Вес рецептым мый ом пале», – вашештен республикым вуйлдатышын пашажым жаплан шуктышо.

Тений эн ончычак шуктышаш задаче-влак коклаште Ю.Зайцев тӱҥалме пашам мучашлаш да, калыклан мо кӱлмым, тудын йодмашыж ден вуйшиймашыжым шотыш налын, мероприятий-влакын у планыштым ышташ кӱлмым палемден.

«Тӱҥ задаче – калыкын илышыжым сайракым ышташ. Регионым вуйлатышылан чыла задаче «мланде» гыч, изи гыч тӱҥалеш. Федеральный программе ден национальный проект-влакым, моло кугу йодышым нигӧ кораҥден огыл, но «мландымбалысе» проблемым нӧлталаш, палаш да решатлаш кӱлеш. Мутлан, ик корно шотышто 300 еҥ возен, да тый тудым национальный проектыш пурташ кӱлмым умылет. Тиде регионым вуйлатышын обязанностьшо. Пашам тыге палемдыман, а показатель-влаклан огыл. Нине показатель шотышто мый отчётым ыштем, но южгунам калыкын йодмыжым шуктышашлан иктаж-можым лучо ышташ огыл. Мыланем «тыгыде» йодыш-шамыч дене алмаштыше ден тидлан мутым кучышо еҥ-влак пашам ыштышаш улыт маныныт. Уке, тыге ок лий. Мый пашам тыге ом ыште», – манын Ю.Зайцев.

Вашлиймаште тыгак тӱшка увер йӧн-влакын пашашт дене кылдалтше ятыр йодышым лончыленыт.

«Икте-весым паша лектыш дене палдараш, тачысе кечылан кӱлешан теме-влакым каҥашаш да ик корно дене ончыко каяш манын,  чӱчкыдынрак вашлияш кӱлеш», – мучашлан палемден Ю.Зайцев.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

 

Опубликовать в Одноклассники

Добавить комментарий