Морко район Унчо селаш шочын-кушшо, Марий Эл ялозанлыкын сулло пашаеҥже, Кугыжаныш Погынын 3-шо (2000-2004 ийла) да 4-ше созыв (2004-2009 ийла) депутатше, ятыр ий верысе «Передовик» колхозым вуйлатыше, марий чонан Г.С.Григорьев 12 июльышто лӱмгечыжым палемда.
Пагалыме Геннадий Савельевич, уло вий-куатдам тӱшка пашашке пыштымыдам, ялозанлыкым ончыл верыш лукшаш верч йӱдшӧ-кечыже тыршымыдам, калыкым ик кугу вийыш чумырен моштымо вуйлатыме мастарлыкдам аклен да пагален, Тыланда эн ондак кугу таум каласена.
Пел курым утла жапыште суапле ӱмыргорным эртенда. Ыштыме пашада Тыланда чапым конден. Арам огыл «Передовик» колхозын лӱмжӧ совет элнан пужен-савыркалыме йӧсӧ пагытыштыжат эн ончыл ялозанлык семын Морко районышто веле огыл, республик мучко да ӧрдыжтат шарлен. Кушто, могай колхоз вӱташте 99 имне шоген – иктаж-кӧ каласен кертеш мо? А Те, Геннадий Савельевич, мланде пашан пӱжвӱдшым пален, шӱрымӧ-ӱйлымӧ материал укелан кӧра машинавечыште трактор-машина яра шогымо годым имньын вийжым кучылт моштенда. Моло йӧнымат кычалында, тыге «Передовик» шке лӱмжым сулен, эре ончылно лийын.
1981-1982 ийлаште Морко КПСС райкомын инструкторжылан, а 1982-1990 ийлаште верысе колхозын парторганизаций секретарьжылан ыштымыда годым вуйлатыме сомылым виктарыме опытым погенда. Эре калык коклаште, эре калык дене пырля – теве мо Тыланда ойыртемалтше койышым пуэн. Калыкын полшымыж дене мыняр поро сай паша ышталтын: Ӱярня пайрем, Марий сӱан фестиваль, мӱкшызӧ-влакын погынымашышт да тулеч моло – нунын кокла гыч ятырже кугыжаныш кӱкшытан мероприятийыш савырнен. Тендан тыршыме дене «Салика» кино шочын. Ялысе мастар пӧръеҥ-влак, ожнысо марий пӧртым чоҥен, иза-шольо Венгр Республикыш намиен шогалтеныт – тыге шке вачӱмбакышт налме тӱнямбал нелытан сомылым чап дене шуктеныт. Пашадам аклен, Марий Эл Республикын А.А.Суриков лӱмеш кугыжаныш премийын лауреатше лӱм дене палемденыт.
Марий шӱлышым шижын, Йошкар-Оласе интеллигенций Унчо велыш корным такыртен. Лишыл да тора верла гыч мыняр уна: артист, мурызо, поэт да писатель, сӱретче, врач – верысе поэт Валерий Апакаевын почеламутысо семын, «Унчын ӱжаражым кошталын»…
Пагалыме Геннадий Савельевич!
«Марий Эл» газет редакцийыште тыршыше-влак лӱм дене Тендам 70 ияш чапле лӱмгечыда дене саламлена.
«Айда-лийже ыштыме пашам ужын, шыде лектеш, шӱм коршта» манын ойледа «Кузерак илыштыда, Савельыч?» манын йодмылан. Йӱд омыдам коден, арам ида тургыжлане, олмешда самырык вий толын, нунылан кӱлешан да пайдале ой-каҥашым пуышо мудреч лийза!
Тазалыкдам арален, еш да родо-тукымда, шочшо да уныкада-влак пиал дене илыза. Янык памаш вӱдым подылын, Онар кӱ деч вийым налын, илышаш ӱмырдам умбакыже шуйыза.
Йӧратыме мурыдам муралтыза – «Кӧ шонен рвезе жап эрта манын?» Тек латкандаш ияш годсо шӱм тулда чондам ырыкта.
Л.СЕМЕНОВА
М.Скобелевын фотожо
