Элыштына илыше кажне еш шукерте огыл «ИРИ» АНО-н – Интернетым вияҥдыме институтын увертарыме «Уло еш» проектыш ушнен кертеш.
Тудо Россий президент Владимир Путинын 2024 ийым Ешын идалыкше семын увертарымылан пӧлеклалтеш да кугыжанышыште илыше-влак коклаште традиционный еш поянлыкым пеҥгыдемден толмашке виктаралтын.
Проектыш ушнышо еш-участник-влак икмыняр заданийым шуктен толшаш улыт. Мутлан: чылан пырля кас кочкышым ямдылаш, тоштерыш миен толаш, спорт дене шкем шуараш да молат… Ешын заданийым шуктымыжым пеҥгыдемдыше фотографийым #всейсемьей хештег дене ВКонтакте але Одноклассники соцкыл лаштыклаш вераҥдыман. Марий Эл гыч проектыш ушнышо-влак #всейсемьей12 хештегым кучылтшаш улыт.
Кажне тылзын организатор-влак чыла участниклан промежуточный иктешлымашым ыштат да кажныжлан пӧлекым кучыктат. Март мучаште эн ойыртемалтше еш-влакым палемдаш тӱҥалыт. А пӧлекшым сайымак, куандарен кертшым, сӧрат. Нунын коклаште «Больше чем путешествие» проект деч Россий мучко каяш йӧным почшо 11 турат лийшаш.
А тиде арняште проект организатор-влак уло еш дене У ий пӧлеклан миен толаш темленыт. Участник лияш шонышо еш-влаклан ВКонтакте да Однокласники соцкыллаште регистрацийым эртыман. Ушныза да Россий мучко турым ала тендан ешат сеҥен налын кертеш.
С.Носова
