Марий Эл вуйлатыше Юрий Зайцев Йошкар-Оласе 9-ше №-ан школышто тунемше 10 ияш Мирослава Ямщиковалан Российын Президентше Владимир Путин деч пӧлекым кучыктен.
Ӱдыр Республикысе внешкольный спорт рӱдерын «Хоккей» отделенийышкыже кум ий тренировкыш коштеш. Санденак спортын ты видше дене профессионально заниматлаш формым чийымыже шуын. Пиалешыже, шонымашыже шукталтын!
Мирослава – «Медведи» командын модшыжо-вратарьже. Пытартыш жапыште тиде команде кумдан палыме тӱрлӧ турнирыште таҥасен да кугу кӱкшытыш шуын. Мутлан, 2024 ий январьыште самырык хоккеист-влакын «Шӧртньӧ шайбе» всероссийский соревнованийын республикысе этапыштыже кокымшо верым сеҥен налын, а Мирославам турнирын эн сай вратарьже семын палемденыт. Тений январьыште тыгай таҥасымаштак «Медведи» команде уэш кокымшо верышке лектын, да Мирослава Ямщиковам угыч эн сай вратарьлан шотленыт.
– Элнан Президентше Владимир Владимирович Путин Мирославан серышыштыже йодмо пӧлекым тудын лӱмжӧ дене мыйым кучыкташ йодын. Изирак да каҥгарак капан ӱдырын вратарь улмыжо мылам моткоч вучыдымо лийын. Ӱшанем, тиде формо Мирославам спорт дене утларак пеҥгыде кылым кучаш тарата, – каласен Юрий Зайцев.
Тиде вашлиймаште тудын аваж ден кок шольыжо лийыныт.
Самырык хоккеисткын тачысе кечылан куд медальже, вич грамотшо да ГТО-н отличийже кум шӧртньӧ знакше уло. Тымарте ӱдыр шкенжым иймаште да каратэште терген, но хоккейым ойырен налын да ынде тушто кугу лектышым ончыкта.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
