Йошкар-Олаште тӱҥалтыш класслаште тунемше-влаклан республик кӱкшытыштӧ «Икоян улмо кумдык» уш-акыл марафонын финалже лийын. Тушто рӱдола, Козьмодемьянск да районласе школла гыч йоча-шамыч таҥасеныт.
Заданий-влак куштылго лийыныт манаш каласаш ок лий. Мутлан, Россий флагын кугытшым але Спасский башньын кӱкшытшым шотлен лукташ кӱлын, тыгак национальный вургемым, историй дене кылдалтше личностьым палыман ыле. Тунемше-влак республикысе районла нерген шуко оҥайым пален налыныт.
Марафонышто сеҥышыш Йошкар-Оласе 32-шо №-ан школын «Юные знатоки истории» командыже лектын. Кокымшо верым Волжский район Памар школ гыч ӱдыр-рвезе-влак («Радуга единства» команде) сеҥен налыныт, а Семёновко селаште верланыше 21-ше №-ан школын «Орлята» командыже кумшо лийын.
Танасымашым Марий образований институтын полшымыж дене Т.И.Иштрикова лӱмеш «Синяя птица» гимназий эртарен.
Г.Кожевникова
Фотом Марий Эл Образований да науко министерствын сайтше гыч налме
